Directora di Abraham de Veerschool ta feliz cu nan 86% di graduado

ORANJESTAD (AAN): Danki na her-examen cu algun candidato di examen di Abraham de Veerschool MAVO a tuma,

e porcentahe di e scol cu a logra finaliza y ricibi examen a bira 86%.

   E logro aki ta uno cu a haci directora Jane Bueno-Hooft di Abraham de Veerschool di San Nicolas hopi feliz mes, y riba e anochi di graduacion cu a tuma lugar Dialuna den Las Palmas Ballroom di Holiday Inn Beach Resort, por a mira esaki riba cara di dje.

   Y claro cu ora el a menciona e storia aki, y e sentimento di orguyo di dje, y demas docentenan, publico presente a duna un aplauso bon mereci.  Tanto e docentenan, directiva di scol, e alumnonan, y e mayornan a yuda grandemente pa e scol a yega na e 86% aki.

   Na e graduacion aki no a mira presencia di Ministro di Enseñanza, aunke el a wordo invita.

   Directora Jane Bueno-Hooft a duna un discurso hopi inspirado pa keda empuha e alumnonan aki pa sigui busca forma pa keda educa nan mes.  El a relata storia di algun ex-alumno kendenan a sigui cu nan estudio, y awe ta bon para riba nan pia.

   El a splica tambe cu tin scarcedad di docente, y Abraham de Veerschool mes a pasa den dje.  E lo desea pa alumnonan pensa tambe riba posibilidad pa sigui nan estudio pa bira docente.  Kizas den futuro nan lo bin duna les na e scol di MAVO aki tambe.

   El a elabora tambe con ultimo añanan, nan ta ricibi hopi studiante cu ta cambia di scol y finalmente na Abraham de Veerschool ta bin logra obtene nan diploma.  El a duna palabra di danki na Winston Ho Sing Loy kende no obstante ta pensionado, a bin duna un man pa vak Natuurkunde ora nan a keda sin docente, y cu awor si ta bandona scol.  Otro docente cu ta bandona scol pa bay biba den exterior ta Ana Maria Rodriguez kende ta duna les di Spaño.  Tambe Directora a honra Tineke Pengel, tambe juffrouw Hooker kende ta bay ta celebrando 25 aña den enseñanza, y ta gradici Yadira Winklaar di DPS pa su cooperacion enorme cu e scol.  Na final e Directora a entrega uno-pa-uno e diploma na tur e alumnonan cu a logra slaag pa nan MAVO.