Como 245 alumno femenino di Maria College MAVO lo bay haya curso con pa evita Abuso Sexual y Violacion

Lisette Gomes di Fundacion Mi Voz Ta Bo Voz:

ORANJESTAD (AAN): Durante un conferencia di prensa convoca na Bario Society na Piedra Plat, e dama Lisette Gomes di Fundacion Mi Voz Ta Bo Voz (MVTBV) cu hopi positivismo a lanza nan proyecto nobo cu yama ‘Love & Protect Yourself’, cu ta encera cu lo bay cuminza duna workshops na alumnonan di scol na Aruba, y esey ta encera cu hasta Kleuterschool lo bay ricibi esaki.

   Tur esaki pa siña e mucha muhernan con pa defende nan mes di Abuso Sexual y Violacion.  Un intento serio pa asina stop e cantidad di casonan cu mensualmente ta wordo raporta na Aruba.

   “E ta un proyecto hopi grandi, y nos ta spera di curazon cu e bira algo duradero pa Aruba, pa asina nos por keda haci nos muchanan fuerte pa nan por para pa nan mes, y pa nan defende nan mes,” Lisette Gomes a indica durante e conferencia.

   E proyecto aki a bira posible danki na e contacto cu e Fundacion di Aruba a logra establece cu e Fundashon Bos di Hubentut cu sede na Curaçao, y cu tin hopi aña trahando riba tereno di prevencion, y a hasta crea un programa exitoso cu cual nan ta acudi na diferente scol, y papia cu e mucha muhernan pa asina traha riba nan autoestima, empoderamento, amor propio, y defensa personal.

   Otro siman e grupo di Curaçao lo ta na Aruba pa presenta esaki na e 245 alumnonan femenino di Maria College MAVO, y tambe lo bay duna training na boluntarionan na Aruba pa asina nan tambe bira presentadornan certifica cu por sigui duna e workshop aki na otro scolnan, incluyendo Kleuterschool.

   Na Curaçao e proyecto aki ta exitoso, como cu nan tin un monton di testimonio di muchanan cu a sa di defende nan mes, y sali di situacion di intento di violacion, y hasta intento di secuestro unda e mucha canando banda di caminda, a wordo ranca y hinca den auto.  E criatura a sa di defende su mes y a logra huy di e agare di e malhechornan aki.

   Pesey e Fundacion MVTBV ta convenci cu e balor di e workshopnan aki ta grandi, y ta un intento grandi pa trata di stop e cantidad di casonan di Abusonan di Menor cu ta keda wordo registra na Aruba.

   Gomes a subraya cu awor nan ta enfocando mas bien riba e tema di prevencion.  Y nan ta contento cu e.o. Maria College MAVO ta bay duna e alumnonan femenino e workshop aki.  Pasobra e cabezante di e scol a confirma na e Fundacion, cu den pasado na mas di un ocasion, tabatin caso unda hendenan den auto coriendo rond di scol a trata di forza alumnonan di e scol den auto.

   Pues esaki ta algo hopi importante!  Pasobra durante e workshop, lo bay ta usando auto tambe pa duna e alumnonan indicacion kico pa haci den situacionnan den un auto na momento cu haya nan den un situacion asina, hasta kico pa haci si acaso un arma wordo poni na nan curpa of nan cabez como menaza.  Un berdadero workshop di defensa propio lo bay spera e alumnonan femenino di Maria College MAVO.