Directora di Oficina di Estadistica:
ORANJESTAD (AAN): Desiree Helder Director di Oficina di Estadistica (CBS) ta bisa cu e ultimo cifra di Censo 2020 ta mustra cu tin un crecemento basta grandi den e cantidad di adultonan mayor. CBS a publica proyeccionnan den e poblacion te cu 2040 y ta wak un crecemento basta grandi den e hendenan cu ta 60 aña pariba y hasta esunnan cu ta 80 aña bay ariba.
Helder a agrega cu esey ta indica berdad cu e poblacion di Aruba ta embehece caba biaha mas lihe y mester pone atencion riba e parti ey.
Ta constata cu e adultonan mayor entre mas grandi nan bira nan ta haya mas problema cu nan salud y mas limitacion. Esey ta cuminsa naturalmente ora un persona bira di un edad mas halto y te hasta ta cuminsa na un edad jong tambe ora cu ta sufri di presion halto, diabetes, etc, a bisa.
Desiree Helder, kende tabata presenta na e Foro Nacional di Adulto Mayor a indica cu esaki ta un foro pa informa e publico riba kico ta e realidad di e poblacion y riba kico por spera den futuro.
Esnan cu ta encarga cu maneho por enfoca riba loke nan ta desea pa Aruba pa e siguiente añanan cu ta bin, a señala.
El a finalisa bisando cu e cifranan ta duna un bista riba e poblacion, pero falta y pesey ta importante ora cu CBS mustra e cifranan pa e gobernantenan encarga cu maneho haya e cifranan cu mester.
