ORANJESTAD (AAN) – Director di Banco di Seguro Social Aruba (SVb), Edwin Jacobs, den conferencia di prensa di gobierno,
Diaranzon di e siman aki, a duna un resumen di e Programa di Subsidio di Salario y tambe a presenta un actualizacion di e fondonan di SVb, pa mustra kico ta e desaroyonan cu ta wordo premira.
El a reitera locual Minister Xiomara Maduro a splica prome, cu e subsidio di salario a wordo introduci cu e meta pa mantene cuponan di trabao y e base di e subsidio ta e salarionan, e trahadornan registra na Banco di Seguro Social dia 15 di Maart 2020 y nan salario sigura.
Banda di dje, e ta depende tambe di perdida di benta, cual ta keda midi segun declaracion di empresanan na Departamento di Impuesto.
“Como condicion mara pa bin na remarca pa e subsidio tabata uno cu e compania mester sinti e impacto di e medidanan cu gobierno a tuma pa contene e pandemia y e perdida di benta mester ta minimo 25%.
“Pa cu e pago di subsidio a scoge pa hacie den e luna cu e subsidio tin referencia. Pues si ta Mei ta pag'e den Mei, Juni ta pag'e den Juni, etc.
E consecuencia ta cu na e momento di bay paga e subsidio, e compania ainda no a haci su declaracion di BBO y no sa kico exactamente tabata su benta e momento ey, anto nos a traha riba un sistema di adelanto (voorschot). Y pa cu esey, e dunador di trabao tin cu haci un calculo di kico e ta spera cu ta bay ta su perdida di benta”, director di SVb a splica.
Jacobs a agrega cu e proceso di subsidio di salario ta wordo habri den e di tres siman di e luna, cual ta mas cu mitad di e luna y por lo tanto e dunador di trabao (e empresa) tin suficiente informacion e momento ey, cu e por haci un calculo hopi mas cerca di loke e realidad ta.
“ Pues, a base di su propio declaracion kico ta su perdida di benta, e ta haya un adelanto di su subsidio; y despues, na momento cu e ta bay declara na Departamento di Impuesto, esaki ta calcula e perdida real di benta, a base di e declaracionnan di 2019 y 2021. Na e momento ey SVb ta ricibi informacion y cu e perdida real ta determina tambe e suma real di subsidio cu e empresa mester a ricibi. A base di esey, SVb ta mande un otorgacion definitivo (definitieve toekenning) na e empresanan, y si nan a ricibi subsidio di mas e tin cu devolve esaki, y si a ricibi di menos SVb ta paga locual el a ricibi di menos” Ir. Edwin Jacobs a relata. El a agrega cu den tur dos caso ta sosode den e lunanan cu SVb a controla te cu aworaki y ora e empresa ricibi un decision definitivo si e no ta di acuerdo cune, e por bay den obhecion y nan tin seis siman pa haci esaki. SVb tin un comision di obhecion cu ta consisti di diferente departamento di gobierno; y den caso cu e empresa ta di acuerdo cu e decision definitivo e por contact e departamento di invordering (cobranza) di SVb pa yega na un acuerdo di pago suaviza pa e pago bek di e subsidio cu a ricibi di mas. Jacobs a indica cu loke SVb tin cu paga bek e empresa ta haye despues di un siman, cu e decision definitivo a sali.
“Dia 4 di December 2020 e prome decision definitivo a sali y esey tabata pa e luna di Mei, y dia 10 di November nos a saca e decision definitivo pa e lunanan di Juni y Juli, y Diabierna siman pasa (28 di Mei) nos a saca e decision definitivo pa e lunanan di Augustus, September y October” Ir. Jacobs a duna di conoce.
