ORANJESTAD (AAN): Biaha pasa den e prome vuelta di eleccion na Peru, e residentenan di e pais ey biba na Aruba no por a vota aki debi na e medidanan severo cu tabatin riba e isla aki pa mitiga e brote di Coronavirus.
Pa e di dos vuelta di Elecciones Generales 2021 di Diadomingo awor, dia 6 di Juni 2021, si e Peruanonan biba riba e isla por vota.
Esey ta informacion cu e viceministro di Relaciones Exteriores, esta Ignacio Higueras a bisa. Ademas di Aruba, e Peruanonan biba na Venezuela, Chile, y Paraguay tambe por vota.
Segun Ministro Higueras, un total di casi 1 miyon Peruano cu ta bibando den exterior lo por eherce nan derecho pa vota. E biaha aki si, 100% di e ciudadanonan biba den exterior por vota. E cifra exacto ta 997.033 persona por bay vota na nan pais pa asina participa den democracia Peruano.
El a confirma cu material di voto manda pa exterior a yega na 99.7% di destinonan, y solamente falta Peruanonan cu ta biba na cuatro ciudad na Merca pa haya di nan. Desde 16 di Mei 2021 caba nan a manda e materialnan aki.
