ORANJESTAD (AAN) – Diamars 10 di Mei, manera a wordo informa pa “Grupo-297 na vanguardia di Enseñanza” a tuma lugar na Instituto Pedagogico Arubano, e Conferencia “Enseñanza, nos responsabilidad”.
Señora Marilyn Richardson, Director di Instituto Pedagogico Arubano (IPA) a duna informacion na DIARIO, tocante e Conferencia aki. Manera ta conoci e Conferencia aki a wordo organiza conhuntamente entre SIMAR, IPA y Grupo-297 na vanguardia di Enseñanza.
Señora Richardson a menciona cu e tabata un conferencia hopi interesante, y e ta contento cu hopi hende a asisti, no solamente na IPA mes, pero riba e plataformanan online cu diferente persona a registra, y a sigui e Conferencia aki.
“Nos a dicidi di organiza e Conferencia aki, cu e posibilidadnan cu nos tin; sin fondo, sin nada extra, pero usando e conocemento cu nos tin, e afan cu tur tres organizacion tin pa trece innovacionnan den enseñanza”, señora Marilyn Richardson a señala.
El a agrega cu tur e temanan cu a wordo presenta durante e Conferencia aki a haya acogida. “Nos tabata tin topiconan riba e area financiero, asuntonan di maneho, profesionalizacion, structura di enseñanza, entre otro, y tur a haya nan debido atencion. Loke si mi por wak bek riba e registracion, e hendenan a scoge e tema ‘enseñanza cu continuidad sin barera’. Esaki a haya hopi participante. Esun di profesionalizacion di maestro tambe tabata tin un grupo basta grandi, vooral riba e plataforma online, pero mi por imagina mi, pasobra tin hopi maestro na Aruba, tambe”, e dama a comenta.
Director di IPA ta considera cu e charlanan aki tabata hopi exitoso, pasobra e personanan tabata envolvi den tur e temanan, y nan tabata sinti nan mes liber pa comparti nan opinionnan, locual pa e organizadornan di e Conferencia, ta hopi importante. El a bisa cu manera e titulo di e Conferencia ta bisa: “Enseñanza ta nos responsabilidad” e ta importante pa tur bin hunto pa carga e responsabilidad eynan.
{gallery}Director di IPA hopi satisfecho cu acogida pa Conferencia -Ensenjanza, nos responsabilidad-{/gallery}
