Diasabra anochi lo tin show di Classic Car Club dilanti Playa Linda Beach Resort

ORANJESTAD (AAN): Classic Car Club Aruba a indica na DIARIO, cu nan ta preparando un evento grandi pa Diasabra awor, 30 di Juli 2022.

   Vice-President Philippe Hese a splica cu e club aki estableci na 1988, tabata hopi activo excepto den e prome dos añanan cu Pandemia a afecta e isla na 2020.  Esey a pone cu e organizacion di autonan clasico no a sigui cu e actividadnan di show y ride cu nan ta conoci pe.

   Pero awor na 2022 nan ta birando activo bek, y tin plan pa minimo 1x pa luna nan tene un actividad cu e autonan clasico aki.

   Aworaki tin 22 vehiculo/doño cu ta miembro di e club, y nan ta mira regularmente cu varios auto clasico ta sigui drenta Aruba.  Nan ta activamente acercando e doñonan ey pa check si nan kier mira miembro di e Club.

   Igor Croes cu ta di Classic Car Club Aruba, a bisa cu nan a haya un invitacion di Playa Linda Beach Resort, pa tene un Car Show Night net na e entrada di e Resort.  E ta algo unico, nunca antes haci na Aruba.  Y e show lo ta den curazon di e area turistico.

   Tin di corda cu e autonan clasico ta parti di e cultura di Aruba tambe.  Aki bo ta haya e interaccion cu turistanan, cu ta haci esaki un forma extra special di crea lazo di amistad nobo.

   E Classic Car Club Aruba Night na Playa Linda lo ta Diasabra awor for di 6:00 pm te cu 10:00 pm, net na e entrada di e Resort.  Publico local tambe ta invita pa sigur haya un chens unico pa saca potret.