Director di DOW a relata con Bubali Plas a crece te bira un lugar turistico pero esaki a crea su retonan tambe

ORANJESTAD (AAN):  Director di DOW, Ing. Marlon Croes a sigui splica den conferencia di prensa, con e trayectoria di procesamento di awa di Bubali Plas ta tuma lugar, for di su comienzo na 1970.

            Croes a indica cu ora cu nan ta procesa e awa nan ta des-charge y esaki ta tuma lugar den un saliña. Y lo tabata mesun situacion si nan lo a haci pariba di Ritz Carlton cu e saliña tabata puro santo. “Esaki a trece cune cu ora nos a cuminza los awa den dje bo ta haya un crecemento cu ta trece otro tipo di ambiente, unda nos a haya un Bubali Plas cu hopi vegetacion, pisca y pahra cu tin den dje y, consecuentemente, el a bira un atraccion turistico. Y ora cu bo ta procesa hopi awa den dje, den tempo el a bay causa otro problema grandi, cu nos tabata tin y cu nos a soluciona binti aña pasa, ta cu ora tin yobida duro e bario di Palm Beach Keito, San Miguel, ta inunda”, Marlon Croes a indica.

            Esaki ta sosode pasobra Bubali Plas tin hopi awa, y su overstort hoogte ta halto; kiermen, prome cu e awa yega na e nivel pa bay lama, e ta causa un molester pa e barionan. “Consecuentemente, DOW den e periodo di  2000 pa 2005, a dicidi di traha un canal pa pone sluis den dje, pa por controla e nivel di awa, y asina baha e nivel di awa di yobida, y e molester den e barionan San Miguel, Keito, Palm Beach y banda pariba”, Marlon Croes a splica y a indica cu, consecuentemente, DOW ta bin habri y cera e sluis aki pa e ultimo 15 pa 20 aña. 

            Esaki bao dos circunstancia: 1. Ora tin amenaza di awacero grandi, cu nan ta haya señalnan di Meteo, pa asina e barionan no haya molester grandi y casnan inunda. 2. Na momento cu tin awa halto na dje y ta bira molester pa e vecindario. Pero prome cu haci esey, DOW tin cu controla y balansa bao ki condicion ta habri’e, y ora cu e proceso aki sali o.k  nan ta habri e sluis pa manda awa pa lama.    “Consecuentemente, esey ta e protocol, e procedure cu nos ta haci pa e ultimo añanan”, Marlon Croes, director di DOW a señala.