ORANJESTAD (AAN): E turtuga di lama yama na Ingles Olive Ridley (Lepidochelys olivacea) ta esun di mas chikito di e turtuganan di lama.
E ta haya su nomber debi na e color berde oleifi di su casca den forma di curason.
E sorto aki no ta frecuenta nos beachnan, nan ta biba mas den awanan tropical di Oceano Pacifico y di India, como tambe den Atlantico. Na e parti west di Atlantico tambe nan ta yega na beachnan na Surnam.
E Olive Ridley ta crece te 80 cm y ta pisa menos di 50 kilo. E macho y e embra ta crece mesun tamaño. Sinembargo, e embra su casca ta tiki mas rondo. E turtuga di lama aki ta yega na madurez sexual rond di 15 aña. Hopi embra ta pone neishi tur aña, tin biaha hasta dos biaha den e temporada. Nan ta pone mas of menos 100 webo. Esakinan ta tuma entre 45 pa 65 dia pa broei.
E turtuga aki ta uza tres diferente strategia pa pone neishi: arribadas, neishi su so y strategia combina. Un arribada ta un evento di ponemento di neishi den cantidad grandi di turtuga hunto. Den pasado esaki a inclui miles di turtuga cu ta yega subi tera na mesun momento pa pone nan webonan ariba e mesun beach. Den cierto ocasion, algun embra por uza tur dos strategia. E periodo di tempo entre ponemento di neishi ta mas o menos 14 dia pa e neishinan solitario y 28 dia pa esunnan di arribadas.
E turtuga Olive Ridley su dieta ta varia, nan ta omnivoro, nan ta come mas tanto kreeft, cangreu, shrimp, kwal y pisca chikito. Nan por baha na profundidad di mas cu 200 meter pa busca cuminda. E turtuganan aki nan cantidad a baha significantemente pa motibo di actividadnan humano manera desaroyo di costa, pesca, coleccion directo di e turtuga pa haya e webonan y tambe e cuero di e bestia pa uzo den industria di moda.
Otro strobacion pa e turtuganan chikito ta polucion di luz, ora cu nan ta broei y ta busca caminda pa horizonte pa drenta lama. Luz artificial riba tera ta desorienta e yiunan ora nan ta sali despues di scuridad for di nan neishi den santo, lagando nan incapaz pa yega lama.
