Aña 2023 ta bayendo bon pa Grupo Scout St. Paulus Michael

ORANJESTAD (AAN): Tirando bista atras, e Grupo Scout St. Paulus Michael ta satisfecho cu nan actividadnan teni den e prome cuartal di 2023.

   Grupo di Bever: Aki tin di remarca cu nan Bevernan a trata e tema di ‘Pet Care Beaver’ unda nan a bishita diferente pet shop, experiencia pet grooming con pa cuida bo mascota.

   Ademas, nan a bishita un veterinario y a mira e dierenarts trata un cacho. Por ultimo, nan a bishita un animal shelter pa mira tur e mascotanan cu por worde adopta.

   Grupo di Welp: E grupo di Welpnan tambe cu cuminsa e aña cu diferente actividadnan. Nan a haya un workshop tocante matanan di Aruba. Nan a tene un atardi di hiking den Aruba su bunita naturalesa, y nan explora e costanan di e bario di Savaneta.

   Grupo di Verkenner:  Aki tin di bisa cu e Verkennernan a start sali hopi activo den e prome cuartal di aña. Di hiking, pa golfing, scoutskills, weganan atractivo, y momento di cushinamento.

   E verkennernan a participa tambe na e actividadnan di Aruba su dia nacional di Himno y Bandera y a yuda hisa nos bandera.

   Grupo di Explorers:  Aki ta remarca cu e explorernan tambe a cuminsa e aña hopi creativo y fit cu diferente encuentronan. Nan a organiza un desafio di recetanan di diferente cumindanan.

   Ademas, nan a tene diferente actividadnan manera, entrenamento fisico, varios tipo di deporte, traha konopi, y planeamento di programa, y sin laga afor nan hiking y pier diving.

   Esnan cu kier mas informacion por tuma contacto cu Grupo Scout St. Paulus Michael cu e lider Timothy Lake na 593-5797.