MAIQUETIA: E aerolinea estatal di Venezuela, esta Conviasa a laga mas di 200 pasahero mal pega e siman aki na e.o. Aeropuerto Internacional di Ezeiza na Argentina, tambe Aeropuerto Viru Viru na Bolivia, y tambe na Maiquetia.
“Nan no tin ningun vuelo programa. Tur a wordo cancela, y esey ta un abuso,” ta loke un pasahero a reclama riba un video cu el a pone riba social media di e situacion. Riba e video bo por mira un grupo grandi di pasahero den Terminal cu nan maleta, ta bati man y gritando nan rabia y asina a protesta pa cu e retrazonan y e falta di informacion.
Conviasa a manera keda keto, y no tabata bisa nada na e pasaheronan ta kico lo bay pasa cu nan.
“E no ta mes simple tampoco di huur otro avion pa asina haci e vuelo,” un funcionario a bisa e pasaheronan cu a keda mal pega na Argentina. “E demanda pa daño y perhuicio lo por ta mucho mas cu djis huur un otro avion,” un di esnan afecta a bisa.
Despues a bin haya sa poco-poco, cu vuelonan a wordo cancela.
Algun persona riba social media a splica cu Conviasa a bende vuelonan directo for di Caracas pa Buenos Aires. E aerolinea ta haci un escala prome na Bolivia, y esey ta algo cu nan no a informa e pasaheronan di dje. Na final a suspende vuelonan sin a duna motibo.
Tin algun pasahero cu a mustra, cu nan a paga como US$ 1.300 pa pasashi.
