E suma liber di impuesto ta Afl. 30.000
ORANJESTAD (AAN): Pa aña 2024 lo no tin cambio den e tarifa di inkomstenbelasting y loonbelasting. Manera conoci e mesun tarifa cu ta valido pa inkomstenbelasting ta valido tambe pa loonbelasting. E tarifa aki ta hopi importante tanto pa persona priva, doño di trabou y comerciante cu tin empresa propio (eenmanszaak).
Pa loke ta e suma liber di impuesto, esaki ta keda Afl. 30.000. Esaki ta nifica cu si e entrada fiscal ta Afl. 30.000 of menos pa aña, e persona no ta paga inkomstenbelasting of loonbelasting den aña 2024. Tarifa di inkomstenbelasting/loonbelasting 2024 E tabel di tarifa di inkomstenbelasting/loonbelasting 2024 ta como lo siguiente: WAK TABEL ADHUNTO
Con ta haci e calculacion di impuesto? Aki ta sigui un splicacion di e forma cu ta calcula e suma di impuesto.
- Prome cu aplica e tabel pa calcula e suma di impuesto mester deduci e suma liber di impuesto (belastingvrije som) di Afl 30.000.
- Na final ta haci e suma di impuesto cu a wordo calcula, un suma cera.
Ehempel:
Entrada fiscal pa aña: Afl. 65.432
Suma liber di impuesto: Afl. 30.000 -/-
Entrada riba cual ta aplica e tabel: Afl. 35.432 (mira categoria di entrada nr.2)
Kita suma di kolom I (categoria 2): Afl 34.930 -/-
Saldo: Afl. 502
Impuesto riba Afl. 34.930 segun kolom III (categoria 2): Afl. 3.493,00
Impuesto riba Afl. 502 (21% segun kolom IV): Afl. 105,42
Suma total di impuesto: Afl. 3.598,42
Inkomstenbelasting of loonbelasting cu mester paga: Afl. 3.598 (pa aña)
Departamento di Impuesto tin un calculator den forma di un MS Excel file, cual e contribuyentenan por uza pa calcula e suma di inkomstenbelasting of loonbelasting automaticamente. E file aki yama ‘Calculator IB-LB 2024’ y por baha esaki di su website impuesto.aw. Ta importante pa un y tur, specialmente e doñonan di trabou cu tin cu prepara payroll di nan empleadonan durante aña 2024, pa aplica e tabel di tarifa di inkomstenbelasting y loonbelasting corectamente.
