ORANJESTAD (AAN) – Den e sala di exposicion di UNOCA, a tuma lugar un conferencia di prensa, den cual a wordo anuncia e diferente proyectonan cu ta bay tuma lugar, en conexion cu e temporada di festivalnan di Dande, pa aña 2023.
Lyonel Dirksz, presidente di Comision Celebracion Dianan Nacional (CCDN) a bisa cu nan ta uni cu UNOCA pa forma un partnership pa asina engrandece mas ainda, e diferente organizacion cu pa añanan ta bin presenta e festivalnan di Dande na Aruba.
Dirksz a expresa cu e bon noticia ta cu e aña aki tin cinco festival di Dande, cual interes cada aña ta crece mas y mas. Den e conferencia di prensa a participa Fundacion Chico Harms, cu manera ta conoci lo tin su festival di Dande dia 27 di December, den Centro di Bario Brazil. Tambe Comision Promove Cultura lo bin cu un competencia di Dande infantil-hubenil, cu lo tuma lugar dia 28 di December, Stichting Arugalde cu e aña aki ta uni cu Comision Celebracion Dianan Nacional, pa yuda engrandece e actividad di Dande y cual evento lo tuma lugar dia 29 di December. Ademas e Fundacion Cultural di Festivalnan Folklorico conoci den pueblo como Festival di Dande di Harry Croes (dfm), cu e aña aki tambe ta bay tuma lugar dia 29 di December. Algo mas cu ta bin acerca di e cuater shownan cu ya caba ta conoci ta bay tin tambe un paranda di Dande riba trailer cu ta programa dia 29 y 30 di December awo. Esaki ta un concepto hopi diferente cu pa prome bez ta bay tuma lugar na Aruba.
Dirksz a expresa cu e comision ta hopi contento cu e biaha aki, hunto cu UNOCA lo forma un partnership pa por brinda sosten na tur organizacion cu tin como meta engrandece e Festival di Dande.
Directora di UNOCA a bisa cu for di aña pasa a cuminza un partnership entre Unoca y CCDN pa asina por yuda na un miho manera, e organizacionnan cu ta prepara festivalnan di Dande.
Aña pasa tabata tin Fundacion Promove Cultura, cu festival infantil y hubenil di Dande den Centro di Bario Brazil, hunto cu Fundacion Chico Harms cu ta custumbra cu organiza show di Dande, y tambe tabata tin Festival di Dande di Adulto y e aña aki a bin dos evento mas acerca, cu bay tuma lugar dianan 29 y 30 di e luna aki. Esta, e festival di Dande na Paradera y e paranda di Dande riba trailer.
E paranda aki ta algo completamente nobo, innovativo, cu ta un colaboracion entre Go Cultura Foundation, Unoca y Comision Celebracion Dianan Nacional, y e meta ta haci cultura mas accesible. Den e dianan cu ta sigui lo anuncia e locacionnan unda e paranda di Dande lo presenta cu varios cantante.
