ORANJESTAD (AAN): Diahuebs mainta DIARIO a Juan entrevista presidente di Fundacion Dominicano Arubanse Juan Pablo Duarte, Winston Tavarez, relaciona cu e accion di recaudacion di comestibles di e fundacion.
“Esaki no ta e prome aña cu nos ta recauda comestibles pa personanan di menos recurso den nos comunidad”.
Pa varios aña caba nos ta haciendo e iniciativa aki, unda cu tur fin di aña nos ta recauda comestibles pa yuda esnan den comunidad cu tin mester di ayudo.
Nos a cuminza un tiki laat e aña aki, pero nos kier haci un apelacion na comunidad y comercio pa coopera y trece locual cu nan por na e fundacion, segun Tavarez.
El a splica cu e accion di recaudacion di aña pasa a bay bon y despues cu e edificio di e fundacion tabata cera pa remodelacion, awor tin un lugar adecua atrobe pa ricibi esnan cu kier yuda y pa sigui duna e servicio na comunidad en general.
Tavarez a splica cu prensa ta importante den esaki, pasobra no ta tur hende sa kico e fundacion ta haci y unda e ta ubica.
El a menciona e adres cu ta Nieuwstraat 34D y e number di telefon cu ta 5921679.
E presidente di e fundacion a sigui bisa cu cualkier persona cu kier aporta cu comestibles manera entre otro aroz, azeta di cushina, y cualkier tipo di producto den bleki, por pasa libremente na e fundacion, of yama e number di celular.
“Durante full e temporada di Pasco nos ta bay ta akinan y Diadomingo nos ta bay ta akinan for di oranan di mainta pa por ricibi tur e donacionnan di comestibles y nos lo tey te cu 6’or di atardi”, segun Tavarez.
