Fiscalistanan di De Meza a entrega nan relato
*E posibilidad t'ey cu caso lo finalisa den Corte
ORANJESTAD (AAN): Diaranson atardi, Prome Minister Mike Eman a reuni cu Gobernador Alfonso Boekhoudt y e motibo di esaki tabata pasobra e mandatario a entrega documentonan adicional cu e fiscalistanan cu Sr. Mike de Meza a entrega na su persona.
Eman a agrega cu el a comparti e documentonan aki cu Gobernador y den cual tin poni cu Sr. De Meza a paga tur locual ta su obligacionnan di impuesto. El a indica cu e fiscalistanan ta duna un relato amplio y esaki ta locual el a comparti cu Gobernador, Eman a remarca.
Mike de Meza y su asesornan a produci hopi documento, e mandatario a bisa, pa mustra cu hechonan riba locual tabata e inkietud tocante su posicion y nan ta mira cu esaki no ta algo cu mester impedi Sr. de Meza pa bira minister.
"Esaki ta un proceso cu ta cana hunto cu Gobernador y p'esey awe mi a entreg'e e documentacionnan aki cu ta wordo substancia door di tres fiscalista y naturalmente nos tin tur respet pa e proceso y pa e motibo ey, Gobernador tambe ta envolvi", Mike Eman a expresa.
Mester agrega cu tin tambe e parti di e fiscalistanan di Departamento di Impuesto cu ta esnan cu mester duna luz berde y bisa cu tur cos ta corecto. Na otro banda tin e fiscalistanan di De Meza cu nan posicion. Esaki ta un caso cu te hasta lo por termina den Corte, Eman a manifesta.
E posicion di e fiscalistanan di Mike de Mesa ta cu el a cumpli cu tur e pagonan cu mester a cumpli cu ne. Toch si tin diferencia di opinion, den Corte lo mester dicidi riba un base huridico.
Aworaki Gobernador ta na altura di tur argumento y e lo haci su ehercicio tambe y si no tin claridad, De Meza a indica cu e lo hiba e caso aki Corte.
