DIMP a test e sistema digital BOi y e ta funcionando bon

Directora Luenne Gomez-Pieters:

ORANJESTAD (AAN) -- Directora di Departamento di Impuesto (DIMP), Luenne Gomez-Pieters, den conferencia di prensa unda e sistema digital “Bo Impuesto” (BOi) a wordo lanza oficialmente, a declara tambe cu e no ta kere cu e sistema aki ta pega.

   “Nos tin, actualmente, diesun mil contribuyente caba,  cu ta comerciantenan den nos sistema digital, cu tur luna ta entrega nan formularionan y tur luna ta haci pago.

   Nos sa, y nos ta conciente, cu e lunanan nos dilanti nos tin cu incorpora casi 60 mil contribuyente cu awe of mañan no ta bay drenta di biaha den nos sistema, y e  pasonan cu nos ta guia e contribuyente pa por registra su mes”, Gomez-Pieters a indica.

El a añadi cu nan a test esaki tambe, internamente, y e registracion ta suppose di ta “un happy flow”, pues si e persona tin su username, cu e mes ta bay pensa kico ta su nomber cu e ta bay registra su mes como usuario, e tin su ID, su personal number, of e tin e copia di un cobranza di inkomstenbelasting e ta suppose di bay den un transaccion simpel.

“Bo ta haya tres email di Departamento di Impuesto. Un di nan cu ta bisa bo cu bo registracion a wordo tuma den consideracion, nos ta controla den background si ta tal persona ta bezig dunando su datonan personal, despues nos ta confirma bo username cu bo mes a yena den e sistema, y bo ta haya un ‘one time password’ pa bo drenta den nos portal. Na momento cu bo uza bo ‘one time password’ eynan, bo type over y e ta bisa bo cu bo mester tin un password di bo mes, pa e siguiente biaha cu bo login bo ta haya bo datonan. Nos a test e y esaki ta funcionando”, director di DIMP, Luenne Gomez-Pieters a conclui.