Parlamentario Jennifer Arends-Reyes (AVP):
ORANJESTAD (AAN) – Parlamentario Jennifer Arends-Reyes a expresa su satisfaccion cu e presupuesto 2026 pa Departamento di Obra Publico (DOW), caminda cu Gobierno di AVP-Futuro a aloca un cantidad importante di 3.5 miyon pa DOW su gastonan y 15,6 miyon florin di diferente fondo adicional manera fondo di inversion, renobacion di bario pa drecha, renoba y mantene infrastructura riba Aruba.
Segun Arends-Reyes, e decision di asigna e presupuesto aki ta un señal cu AVP-Futuro ta tuma infrastructura na serio y ta pone e necesidadnan di pueblo Arubiano na prome lugar. “Infrastructura ta un fundeshi esencial pa nos desaroyo economico, siguridad di trafico, y calidad di bida. Sin un mantencion serio, nos ta laga nos pais atras,” Arends-Reyes a declara.
E parlamentario a splica cu e 19,4 miyon florin lo bay directamente pa trabounan di mantencion y reparacion di caminda, drechamento di infrastructura deteriora, y otro proyectonan esencial pa comunidad. “Pueblo ta mira y ta sinti e dañonan riba caminda tur dia. Esaki no ta solamente un asunto di comodidad, pero tambe un asunto di siguridad,” Arends-Reyes a bisa.
Arends-Reyes a enfatisa cu durante e ultimo añanan, falta di inversion structural den mantencion di infrastructura a contribui na atraso grandi. “Awor AVP-Futuro ta mustra liderazgo y responsabilidad. E presupuesto 2026 di DOW ta un paso concreto pa evita mas deterioro y pa yuda cu e atraso cu nos ta cargando.”
Fraccion di AVP a entrega 7 mocion cu ta duna contribucion na deseonan y posibel solucionan pa comunidad cu ta entre otro mas desaroyo riba nivel di mantencion na San Nicolas, drecha mas beach pa baha e concentracion riba beachnan popular, solucion pa parkeo den e area hotelero, bin cu fondonan adicional pa infrastructura, peticion pa rotonde pa cruzada peligroso, entre otro.
Tambe Sra. Arends-Reyes a trece dilanti varios pregunta y peticion pa atencion pa barionan manera Palm Beach, Rooi Afo, Tanki Leendert, Caya Frère Alexius, Kukwisastraat, scolnan, riolering cu por conecta cu Watty Vos Boulevard. Tambe a pidi pa agilisa proceso di permiso di construccion y pone mas personal pa yuda den DOW.
“Nos ta traha pa un Aruba mas fuerte, mas sigur y mas moderno. Infrastructura no ta un luho; infrastructura ta un necesidad,” Arends-Reyes a conclui.
