Tur dia tin control riguroso di prijs di canasta basico
ORANJESTAD (AAN) Minister Geoffrey Wever nunca a vocifera cierto tipo di criticanan contra comercio, e sa cu como un economia chikito cu Aruba tin, unda casi tur producto ta wordo importa, e costo di un producto ta wordo determina pa e prome mercado internacional for di unda e ta wordo importa, y e gastonan di flote, seguro, transporte y despues e invoerrechten.
Esaki ta haci tambe cu tur cos cu ta sosode na mundo e costo ta bin pa nos den e prijsnan, y naturalmente, e comerciante mester agrega un porcentahe pa e por haci su ganashi.
Asina e dignatario a señala den un entrevista cu Matutino DIARIO, den cual el a señala cu e tin contacto cu hopi comerciante.
“Y mi sa cu e no ta manera e percepcion cu tin eyfo cu nan ta hisa prijs na nan antoho, nan tambe ta traha pa ta sigur cu nan ta keda sobrebibi. No ta kita afo cu prijsnan ta keda halto pa nos comunidad, pero mi no ta sinti cu comerciantenan t’abusa di prijs, locual bo ta scucha hopi biaha. Bo ta scucha hopi biaha cu no tin control di supermercadonan. Mi no ta di acuerdo cu esey, pasobra Departamento di Asuntonan Economico ta controla e prijsnan.
Mi ta kere cu nos comunidad ainda no tin ainda un entendimento cu tin un distincion entre prijs di productonan den e mercado liber, y esunnan cu ta den e canasta basico. Esnan den canasta basico ta prijsnan cu gobierno ta bisa e comerciante cu ta tanto ganashi nan por haci riba un producto”, e dignatario a menciona.
Minister Wever a indica cu esey nan ta controla tur dia den tur supermercado, e control ta rigido y e violacionnan ta minimal. “Casi no tin violacion riba canasta basico, nos ta monitor, y nos sa ken comete un infraccion y ora nan ta comete un infraccion nos ta pone cambia e prijs inmediatamente y nan ta haci’e tambe”, Minister Geoffrey Wever a declara, agregando cu eynan gobierno ta limita e ganashi di e comerciante y no por gana mas di locual gobierno ta stipula.
