ORANJESTAD (AAN) – E comunidad Catolico di Aruba a lanta diadomingo cu un noticia masha tristo y lamentable, cu den oranan di madruga di Diadomingo, vandalistanan a destrui e imagennan di dos,
di e tres pastornan cu ta acompaña e imagen di la Birgen di Fatima, cu ta poni dilanti Misa Santa Filomena na Paradera, ya pa varios aña caba, pa cual e fielnan tin hopi amor y respet pe, pasobra e ta simbolo di un historia masha bunita di e aparicion na Portugal di e Santisimo Birgen.
Manera historia ta conta, y Iglesia di Roma a certifica tanto aña atras, Lucia, Francisco y Jacinto a haya varios vision cu Birgen di Fatima, ken a duna nan cierto mensahenan importante pa e humanidad.
Un di e personanan cu ta yuda den Misa, Diadomingo mainta ora el a yega a mira con e imagennan di e dos pastornan tabata benta abao full kibra, ken a bati alarma na e Pastor di e Parokia.
E vandalistanan a durf di ranca y flor di e hardin chikito cu tin unda e imagennan ta, y a bin pone den mannan di e imagen di Mama Maria. Polis a wordo poni al tanto di e hecho inconcebible y inaceptable aki, y ya autoridad ta investigando e caso.
