ORANJESTAD (AAN) – Manera ta conoci Fundacion Rancho recientemente a muda pa su Centro di Actividad nobo, ubica na Visstraat, banda di Museo Arkeologico Aruba.
Clifford Rosa, den conferencia di prensa a splica cu nan a cuminza prepara desde Juni, dia 1 di Juli nan a muda y dia 31 tabata tin nan “soft opening”, cu un exposicion den e galeria di e Centro Actividad Rancho, den nan localidad nobo. Nan a haci un marcha tambe siman pasa y tur esaki ta danki na e comunidad di e bario di Rancho, henter pueblo di Aruba y bishitantenan cu a participa den e evento.
Clifford Rosa, a splica extensamente, kico ta e meta pa cual Stichting Rancho a firma un carta di entendimento cu 'Aruba Sister Cities Association' (OASCA), lidera pa señor Ralph Romsom. OASCA ta un organizacion di Arubianonan biba na Merca.
Esaki den cuadro di un proyecto nobo cu nan a inicia ya caba dia 10 di April 2020, no obstante cu nos pais tabata den pleno pandemia y den un situacion hopi dificil.
Pero nan a braza e pensamento pa celebra e di 200 aniversario di Oranjestad, y na un manera pensante, como Fundacion Rancho den su 11 aña di existencia, a cuminza cu un proyecto di cuater aña, esta 2020-2024. Na 2024 Ciudad di Oranjestad lo celebra su di bicentenario.
Clifford Rosa a splica cu Fundacion Rancho hunto cu su Centro di Actividad ta bay acentua riba cierto proyectonan. Despues di Hofi di Bario, nan ta bay crea awo un “herbal farming” of un tipo di agricultura urbano.
Nan a haci cierto cambionan necesario di maneho manera e pandemia mes a demostra nan. Pa añanan, el a agrega, e fundacion ta atende cu e parti di “SDG” y den esaki tin un number importante cu ta 17, cu kiermen colaboracion.
Den e parti di colaboracion nan a topa cu cierto retonan, y e retonan aki a hiba Fundacion Rancho yega na un momento crucial, unda cu Clifford Rosa a introduci un hermandad, den e caso aki cu e director di un organizacion internacional NGO, Ralph Romsom.
Clifford a splica cu Oranjestad ta Fundacion Rancho su punto di enfoke, banda di loke nan a desaroya pa diez aña largo, cu ta Fundacion Rancho, cual ta e curazon di tur locual a desaroya na Oranjestad, pero awo mester mira Oranjestad como e curazon pa desaroya Aruba, ya cu e ta un area cu un historia economico, den diferente aspecto, cu mester ta bon documenta pa bira e legado pa nos siguiente generacionnan.
Clifford a introduci señor Romsom, ora a firma e protocol of memorandum of understanding, cual ta un paso hopi grandi pa Fundacion Rancho. Nan semper ta cumpli cu tur e protocolnan diplomatico, ora nan ta acerca organizacionnan internacional, Clifton a bisa.
Y awo, Fundacion Rancho ta bay haya sosten di otro organizacion internacional situa na Merca. Clifford a gradici Ralph Romsom pa su presencia, apesar di e pandemia.
Ralph Romsom a hiba palabra y a bisa cu e meta di OASCA como un organizacion cu ta di Arubianonan biba na Merca, cu no tabata tin un plataforma pa duna algo bek y a crea “Aruba Sister Cities Association” cu e meta pa atrae cinco ciudad prominente na Merca, pa haci un intercambio entre Oranjestad y e cinco ciudadnan concerni.
Pa logra esaki nan tin cu haci conexion cu tur sector na Oranjestad y Aruba en general, y esun prome riba lista, tabata Stichting Rancho, cu ta enfoca riba e herencia y historia di Oranjestad, pa di eynan re-launch Oranjestad pa cu futuro, Romsom a acentua.
OASCA y Fundacion Rancho a firma un MOU formal pa traha hunto y eleva Oranjestad, manera un “globo city” den futuro, y ki miho di awo te 2024 cu ta e bicentenario di Oranjestad, Ralph Romsom a remarca.
