ORANJESTAD (AAN) – Como ultimo grupo cu a participa den e reunionnan entre stakeholders externo y Formador Evelyn Wever-Croes,
den cuadro di formacion di Gabinete Wever-Croes II, Stichting FUNARI a tuma e oportunidad, y den conferencia di prensa, despues di e reunion, su Directora Lila Mackay a elabora tocante e resultado di e reunion.
“Como Stichting Funari awe mi tabata tin e honor y oportunidad pa presenta na Formador nos preocupacionnan pa cu Funari.
Funari ta un Stichting conoci den comunidad pa van op personanan grandi cu ta den rolstoel, pero eigenlijk su mision ta mas amplio cu esaki.
Funari tey pa tur persona cu tin cualkier tipo di limitacion, anto awe Funari a trece su preocupacion na Formador, cu pa por traha dirigi na su proposito, lo tin mester di hopi mas ayudo y mas sosten di Gobierno, y tambe di nos comunidad”, señora Mackay a comenta.
Mackay a agrega cu loke e fundacion kier logra, den su plannan pa futuro, ta pa por guia hobennan cu tin limitacion pa nan por yega di participa completamente den nos comunidad, y tambe pa nan por logra di haya un trabao y mantene esaki.
E dama a agrega cu Funari tin diferente meta pa futuro y door cu semper e fundacion tabata conoci pa ricibi personanan grandi den rolstoel, e recursonan cu nan tabata tin pa eherce e trabao no ta loke nan mester pa brinda e servicio na e clientela completo. Pues, pa tur persona cu tin un limitacion y ta desea na haya un trabao of un tipo di coaching of training pa por haya y mantene un trabao, of pa demostra e talentonan y habilidadnan cu nan tin, Funari no tin e recursonan necesario pa por brinda e servicio na e clientenan aki.
Esaki ta un di e preocupacionnan, otro ta loke ta regarda e tratado di e derechonan di personanan cu limitacion cu ainda no a wordo ratifica. “E ratificacion di e tratado aki ta nifica, en general, un miho calidad di bida pa e personanan cu limitacion, pasobra esaki ta haci posible pa nos por haci e edificionan mas accesible, cu stacionamento mas adecua, y haci Aruba mas alcanzable pa e personanan cu limitacion por participa den comunidad, manera nos cada un, como ciudadano”, señora Mackay a señala.
