Dilania Matos ta empleado di luna juli na Hospital

ORANJESTAD (AAN):  Dilania Matos ta empleado na departamento di Hoteldienst y encarga cu limpiesa riba sala di operacion.

Ela yega su shift y a drenta hunto cu su teamleider unda el a topa cu gritonan duro di ‘surprise’. Hunta di Directiva, su famia y coleganan di diferente departamento a bin hunto pa sorprend'e cu un momento inolvidabel. E no a sospecha net nada y e reconocemento di bira empleado di luna di juli a lag’e emociona y feliz.

            “Mi a cuminsa traha aki na hospital na aña 2005, pa ta exacto dia 1 di november”, asina Dilania Matos ta conta. Inicialmente el a cuminsa traha a base di un contract externo pero na aña 2012 ela aplica y drenta den servicio di hospital mes. “Pa traha den Sala di Operacion ta rekeri hopi training y tambe curso. Na momento cu e vacatura pa haci limpiesa den sala di operacion a sali mi a solicita y a haya e grato noticia cu nan a dunami e oportunidad bunita aki”, Dilania ta conta emociona.

            Dilania ta un colega cu semper ta yega trabou feliz. E tin hopi amor pa su trabou y ta gusta loke e ta haci. E ta sumamente flexibel, colegial y ta responde lihe riba trabounan cu tin cu wordo ehecuta. E ta dedica na duna servicio di calidad y ta yega semper prome cu tempo pa percura cu e sala di operacion ta completamente limpi y cla pa wordo uza.  Dilania ta bay ‘the extra mile’ pa yuda otro colega y su compromiso cu su trabou ta di admira.

            Charlissa Chaljub, Manager Hoteldienst, a duna di conoce cu Dilania ta un persona cu tur dia ta yega y drenta cu hopi entusiasmo oficina. Chaljub ta describi Dilania como un persona profesional cu ta desplega su funcion cu hopi amor, cariño y dedicacion. E semper ta cla pa yuda mescos cu e lema di HOH “Dilania semper t’ey!”

            Dilania sigur a demostra di ta un colega ehemplar cu ta cumpli cu e lema, norma y balornan di Hospital pues merece e tremendo reconocemento aki. Hunta di Directiva, management y coleganan ta hopi contento di tin Dilania den team HOH. Masha pabien Dilania!