ORANJESTAD (AAN): Tormenta Tropical Erin lo por bira un Horcan riba mañan Diahuebs,
y asina lo bira e prome Horcan di e temporada aki di 2025. E riesgo ta creciendo tambe cu e lo por yega cerca di St. Maarten y Puerto Rico, segun National Hurricane Center a alerta riba Diamars.
Segun e meteorologonan, entrante awe Diaranson e lo cuminza haya mas forza, y asina Tormenta Tropical Erin lo por bay bira Horcan, y despues escala y bira un Horcan mas poderoso, di por lo menos Categoria 3 pa fin di siman aki.
E area unda e ta yegando, tin un ambiente y temperatura di awa cu ta hopi mas faborabel pa e ciclon fortalece. Mirando cu e ciclon ya caba tin un structura bon defini, e lo por bira un Horcan riba Diahuebs anochi laat. Despues e lo sigui crece y haya mas forza.
Nan ta reconoce cu tin ‘incertidumbre’ riba e ruta cu Erin lo tuma, pero nan ta recomenda pa tur e Islanan mas pariba di Caribe ta cauteloso, y tambe pa e costa banda pariba di Merca tin di sigui su movimento.
Diamars atardi 5:00 pm, e centro di Tormenta Tropical Erin tabata na 17.0º Nort y 38.3º West. Esaki ta como 2.620 km pariba di St. Maarten. Y e ta moviendo direccion west cu velocidad rapido di 35 km/h.
Bientonan maximo sosteni rond di e centro ta di 75 km/h, pues ta keto bay un Tormenta Tropical. Te ainda no tin ningun Watch ni Warning valido pa paisnan, pero islanan manera St. Maarten, Saba y St. Eustatius tin di keda vigilante, y tambe esnan di US Virgin Islands y Puerto Rico tin di monitor e movimento.
