Santiago Montemiranda ta orguyoso
ORANJESTAD (AAN): Riba Dialuna, e studiante Santiago Montemiranda a pone un potret impactante di dje cu su diploma den su man.
El a logra su titulo di Master of Science den ‘Innovation and Sustainable Business Development’ na Norges Teknisk-naturvitenskapelige Universitet conoci como Univeridad NTNU na Noruega.
Inmediatamente a dicidi na pone su relato pa splica con un hoben di EPB Oranjestad por sigui subi e trapi, y yega na obtene titulonan universitario cu hopi orguyo.
“Den mi tempo na EPB mi a tende frasenan mane ‘..scol pa burico..’, ‘..bo no por a haci miho?..’, tambe ‘..scol di hoben problematico..’, etc. Tur e comentarionan aki y e prehuicio riba scol y su studiante a haci cu Santiago (conoci pa hopi como ‘Santi’) cu el a perde motivacion pa sigui studia.”
E ta bisa cu danki na docente cu pasion pa nan trabao, manera docente Sabina Vrolijk, e alumno aki no a give-up.
E caminda tabata largo y dificil, pero no imposibel. Mi ta spera nos por motiva mas hoben pa follow nan dreams, sin prehuicio di cua skol nan ta bay.
Inmediatamente un cantidad di hoben di tanto EPB y tambe EPI a duna nan comentario, y algun a expresa con e studiante aki ta un di esnan mas sabi y disciplina cu nan conoce.
Palabra di pabien grandi ta loke DIARIO tambe ta manda pa Santiago, y sigur hopi respet!
