Jessica van Montfoort-Posner di FCCA:
ORANJESTAD (AAN) E plataforma digital online DigiBID awo ta facilita tur compania local grandi y chikito participa na destahonan di Fundacion pa Cas pa Comunidad Arubano (FCCA). Cu e innovacion aki, no mester di mas papeleo y no mester entrega ofertanan manualmente. e procesonan ta bay mas lihe, sigur y completamente online.
Señora Jessica van Montfoort-Posner di FCCA a splica cu e proceso di registracion ta hopi facil. Pa registra mester bay riba website di FCCA, www.fcca.com. Ora di registra mester yena un formulario y unicamente mester maximo tres documento, entre otro copia di un ID valido, un copia di registracion na Camara di Comercio (KVK), y si tin NV of VBA, mester un copia di registracion di accionista.
Despues di entrega esakinan, si tur cos ta bon, y e peticion ta aproba, den menos di tres dia interesadonan cu a registra ta forma parti di DigiBID.
Montfoort-Posner a indica cu e beneficionan di ta forma parti di e plataforma aki ta cu automaticamente ta ricibi notificacionnan via email ora cu tin algo nobo, por wak tur destaho, por entrega ofertanan mas facil via e portal, y tambe ta brinda siguridad cu ofertanan ta keda confindencial ta na momento di apertura. Esaki ta garantisa un proceso husto y transparante. Un otro beneficio ta cu por haci ofertanan online, sea riba telefon of laptop, sea na cas of unda cu ta.
DigiBID ta simplifica procesonan sin sacrifica transparancia ni siguridad. Entregando e documentonan necesario, empresarionan por registra y participa den destahonan completamente online. E iniciativa aki ta un paso importante, moderno, eficiente y accesibel, y ta fomenta igualdad di oportunidad pa tur compania, grandi, mediano y chikito na Aruba.
