Diestres mucha muher a ingresa den Trayecto di Formacion Social 2023

Coordinador Jessy Ras a duna di conoce:

*30 hoben a pasa den proceso di seleccion 

ORANJESTAD (AAN) –Jessy Ras, Coordinador Trayecto Formacion Social (STV), a comenta cu desde aña 2021 STV a cuminza cu e trayectoria pa muchanan muher. Pa e aña aki nan a logra cera un grupo di 13 dama, di mas of menos 30 cu a pasa den e proceso di seleccion.

            E 13 damanan aki ta cla pa a cuminza cu nan trayecto dialuna cu a pasa, dia 21 di Augustus. Ras a comenta cu nan a adapta algun aspecto cu STV a siña di e grupo anterior, y nan a draai e grupo di mucha muher mescos cu e grupo di mucha homber. E participantenan aki ta den edad di 17 te 23 aña.

            Duna nan instruccion no ta un tarea facil, Ras a indica. E ta rekeri di hopi pasenshi, pa traha cu nan. Cada hoben tin un caracter diferente, y mucha muher nan nervionan ta un tiki mas halto. Coleganan di Jessy a bay haci un curso na Curacao tocante con pa deal cu hobennan problematico, y asina a duna e 13 participantenan charla, y tayer di trabao, y actualmente tin un grupo di trahado social cu tambe ta deal tambe cu e hobennan cu e diferente problemanan cu nan por tin.

            E programa pa mucha homber y mucha muher ta diferente. Mucha homber ta mas fuerte cu mucha muher loke no kiermen cu nan no por, pero mester traha riba esey. E parti fisico tambe, tin biaha ta haci un diferencia, y a adapta esey tambe ora di e proceso di seleccion, unda a mira e condicion fisico di cada hoben, y a base di esey a cuminza cu e parti deportivo pa wak nan resistencia fisico tambe.

Asina, tiki tiki ta wak con e grupo ta bay, sea pa bay un tiki mas fuerte cu nan of mas flexible. 

            E prome cuater lunanan ta pa e parti fisico, e formacion militar di e trayecto, y e otro cuater lunanan tambe ta bay core stage, tres biaha pa siman, den un compania sea gubernamental of particular. Tambe nan  ta haya guia si nan no tabata tin trabao, kico nan por spera.

            Ora cu nan ta den stage tambe nan tin “stage begeleiding” y nan ta haya diferente curso cu ta yuda nan durante nan pasantia y ora cu nan caba, ta wak si nan por keda den e lugar di stage mes, of pa medio di DPL wak si nan por haya un trabao, asina cu nan keda cla cu e trayecto. Tambe tin hobennan cu tin MAVO, y cu tin e deseo di bira un militar, y lo enfoca esaki tambe cu e grupo di mucha muher pa wak si otro aña por manda un dama Arubiano pa sigui e opleiding pa militar.