ORANJESTAD (AAN): Manera ta conoci, ‘Disturbio 90L’ a converti su mes den Tormenta Tropical Franklin, y a pasa Dialuna cu mayoria maltempo di awacero pisa cu lamper y strena panort di Islanan ABC.
Aruba a haya nada di esey. Un avion di NOAA Hurricane Hunter a hasta usa Aeropuerto di Aruba pa asina bay haci un analisis di Franklin.
Tormenta Tropical Franklin:Awor National Hurricane Center ta pronostica cu awacero pisa cu inundacion lo cuminza afecta tanto Republica Dominicana y Haiti entrante awe Diamars.
Dialuna atardi 5:00 pm, e centro di Tormenta Tropical Franklin tabata na 14.3º Nort, y 70.1º West. Esaki ta 180 km panort di Arashi Beach di Aruba. E ta igual cu 465 km zuid di Santo Domingo, Republica Dominicana.
Su bientonan maximo soseni ta di 85 km/h, y ta sigui move direccion west cu 7 km/h. Franklin a pone cu Tropical Storm Warning a wordo emiti pa henter costa zuid di Republica Dominicana, henter costa zuid di Haiti.
Tropical Storm Watch a wordo emiti pa henter costa panort y pariba di Republica Dominicana. Tambe pa islanan Turks & Caicos.
Awe Diamars ta calcula cu Tormenta Franklin lo bay cuminza bira dal un buelta skerpi rumbo panort. Esey ta pone cu pa Diaranson marduga
y mainta, e centro di Franklin lo subi e costa zuid di e isla di Hispaniola.
Ta pronostica cu Franklin lo haya mas forza prome cu e yega costa di Republica Dominicana y Haiti.
Tormenta Tropical Gert: Mientras tanto como 605 km pariba di St. Maarten tin Tormenta Tropical Gert. Dialuna atardi 5:00 pm, su centro tabata na 17.1º Nort y 57.5º West.
Su biento maximo sosteni ta di 45 km/h, y e ta moviendo West-Noordwest cu 11 km/h.
Sinembargo National Hurricane Center ta nota cu Gert a debilita bastante, y e lo por perde su status di Tormenta Tropical awemarduga of den dia.
Ex-Tormenta Tropical Emily: Riba Dialuna, Tormenta Tropical Emily a hala su ultimo rosea, y a debilita y disipabastante.
Dialuna mainta 11:00 am, su ultimo posicion tabata 21.1º Nort y 41.9º West. Esaki ta como 1.965 km West-Noordwest di Islanan Cabo Verde, y su ultimo bientonan tabata di 55 km/h. E lo no wordo menciona mas den pronosticonan.
Depresion Tropical #9: Dialuna atardi 5’or, e centro di Depresion Tropical #9 tabata na 25.2º Nort y 91.6º West, cu ta keda riba Golfo di Mexico, y ta 600 km
Oost-Zuidoost di Port Manfield, na Texas. Nan ta pronostica cu e Depresion Tropical aki por haya mas forza prome cu e yega costa di zuid Texas. Parti di Mexico
y Texas lo cuminza haya awacero pisa awe Diamars mainta.
Tropical Storm Warning a wordo emiti pa e boca di Rio Grande te cu Port O’Connor na Texas. Un Tropical Storm Watch ta activo di Port O’Connor bay te na Sargent, Texas.
Disturbio 92L: E disturbio aki tin hopi awacero cu lamper y strena ta acompañe na un forma hopi bon organisa, y e area eybanda ta favorabel pa e bay desaroya y
bira algo mas fuerte den e dianan aki.
E ta moviendo mientras tanto direccion West-Noordwest riba Oceano Atlantico.
