Minister Rene Herdé di Infrastructura ta anuncia:
ORANJESTAD (AAN) Durante siman, DIARIO tabata tin un entrevista cu Minister di Infrastructura, Energia y Comunicacion, señor Rene Herdé, den cual el a anuncia, cu Gobierno ta bay bin cu un “Beach Policy” nobo cu lo cubri henter nos costa.
Previamente el a elabora tocante e problema di stacionamento pa bay den beach, specialmente esnan mas gusta pa hende local y turistanan.
“Esaki ta nifica cu nos ta exitoso den turismo door di atrae mas hende, pero nos no a balansa e necesidad cu nos mes pueblo tin, pa recreacion.
Kiermen, no solamente den beachnan na Eagle, Palm Beach, pero tambe Santo Largo, San Nicolas. Nos ta bay bin cu un ‘Beach Policy’ nobo, kico por, kico no por, trafico banda di e beachnan, con nos ta bay uza e beachnan, tin mag di haci kico, y tambe nos ta bay wak e costo”, e dignatario a duna di conoce.
E mandatario a bisa cu e costo pa opera riba e beachnan ta hopi abao, compara cu e costo cu a subi pa tur hende, tur caminda. “E compania ta bin na cuminzamento di otro luna, y mi ta kere pronto nos un ‘Beach Policy’. Loke nos tin aworaki ta solamente pa e area di Eagle Beach y ta yega banda di Fisherman Hut, y aworaki nos ta bay wak henter nos costa|”, e mandatario a señala pa wak kico ta permiti.
Minister Herdé a señala cu tambe nan ta bay wak e desaroyo na Costa Norte, e casitanan cu nan ta trahando eynan.
“Tin hende ta bisa cu esaki ta nan propiedad pasobra nan tin decadanan ta hacie. No, e no ta nan propiedad, ta propiedad publico, y nos tin cu regul’e, di e forma cu e ta accesible pa tur hende. Y tampoco eynan por sosode cosnan cu nos no kier pa sosode na Aruba, kiermen cu e ‘beach policy’ pa prome biaha nos ta bay bin cu ne integralmente, pa henter nos costa nos ta bay traha riba dje cuminzando otro luna” Minister Herdé a remarca.
