Diasabra di entretenimento unda e 60 plussers a pasa pret den Centro Betico Croes

ORANJESTAD (AAN) – Manera ta conoci, Fundacion Movemiento ta Bida tin un luna di October completamente yen di actividad, dedica na nos grandinan, y cu nan participacion.

Den fin di siman, Diasabra nan tabata den Centro Deportivo Betico Croes unda nan a haci weganan pa pasa pret, tanto weganan di antes como di awo.

Rosa Leon a menciona pa DIARIO, cu e intencion di e dia aki tabata djis pa pasa pret, comparti cu otro, y trece e alegria di tempo di mucha di scol bek “in place”.

Rosa Leon a reitera cu nan a traha den samenwerking cu IBiSA unda dos mucha muher a yuda di un manera fantastico. Nan a hinca e weganan den otro den dos dia, y a haya un participacion di mas of menos 40 hende.

Leon a menciona cu nan a haci wega pa test memoria, busca palabra den corant,  weganan style di team building cu otro, y varios mas, manera wega di reaccion di persona.

Rosa Leon a recorda comunidad cu dia 23 di October aki, tin un 'car rally' y e siman aki lo informa cual ta e dos postnan unda nan lo sali.

Ademas, el a referi na e charlanan hopi importante y actualiza, cu ta bay tin, vooral leynan nobo cu, como 60 plussers, nan mester ta na haltura di nan y cu interesadonan tin chens ainda pa inscribi. Esaki ta bay ta dia 14 di October awo, den Centro di Playa Pabao, den orario di 10.30 pa 11.30 or di mainta.