Diasabra awor tin e prome ‘Baki den Bario’ pa 2026

ORANJESTAD (AAN): Aruba ta continua fortalece su compromiso cu limpiesa y orden den bario,

cu e anuncio di e prome edicion di “Baki den Bario” pa aña 2026, cu lo tuma luga diasabra 7 di maart den e bario di Tanki Leendert. Accion lo ta riba un tereno cu ta keda net patras di Scol Colegio Ora Ubao.

   E iniciativa, cu a haya bon respuesta durante 2025, ta un esfuerso conhunto entre Serlimar, City Inspector, DOW, Compania Carenza y demas stakeholders, cu e meta di facilita comunidadnan cu un forma practico, accesibel y organiza pa deposita sushi y desperdicio voluminoso.

   Durante un conferencia di prensa riba Dialuna mainta, Prome Minister Mike Eman a haci e anuncio y a subraya cu “Baki den Bario” no ta solamente un actividad di limpiesa, pero un instrumento concreto pa acerca servicio publico mas cerca di e ciudadano.

    Na caminda pa Baki permanente: Ademas di e edicion regular den bario, Gobierno a confirma cu tin plan pa pronto introduci un sitio piloto permanente, cu lo ta disponibel 24 ora pa dia, 7 dia pa siman. E sitio aki lo permiti deposito di diferente tipo di desperdicio, tanto residencial como comercial, sin costo pa e usuario.

   E meta ta pa habri e prome sitio permanente na final di maart of comienso di april. Cu esaki, gobierno kier reduci e necesidad pa transporta desperdicio pa otro area remoto y facilita un solucion mas structural pa maneho di sushi.

   Segun stakeholders, e iniciativa ta basa riba colaboracion amplio. “Nos ta mira con Aruba por bin hunto pa mantene nos isla limpi. E apoyo di diferente entidadnan publico y priva ta fundamental pa logra e meta aki.”

   “Baki den Bario” lo sigui move pa diferente bario grandi riba e isla durante 2026, sigurando cu cada parti den comunidad tin oportunidad pa participa activamente den mantencion di un Aruba mas limpi y ordena.