Roderick Croes -Director:
ORANJESTAD (AAN): Ora un auto no ta prohibi pa drenta Aruba, Departamento di Aduana Aruba, Douane ta lag’e drenta y no ta controla detayenan di kico ta permiti of kico no ta permiti segun regla di Dienst Technische Inspecties, DTI of segun regla di trafico, asina señor Roderick Croes, Director di Douane a duna di conoce den un entrevista recien. El a remarca cu tin un diferencia entre prohibicion pa drenta Aruba y e prohibicion pa wordo uza na Aruba. E ultimo aki, ta cay bou di DTI y no bou di Douane.
Señor Croes a enfatisa cu e tarea primordial di Douane ta pa manera cu e auto drenta, controla si tur documento ta na ordo segun e balor di e auto y si invoerrechten ta paga. Autonan cu wordo importa cu entre otro color di luz no ta cuadra cu regla di DTI, no tin prohibicion pa drenta Aruba. “E autonan aki no ta prohibi pa wordo importa y na momento cu nan wordo importa, Douane ta haci specificamente su tarea, cu ta pa percura cu e fractura ta bon, douane waarde ta bon, tur gasto a wordo incorpora. Y na momento cu esaki ta cla, Douane no tin un trabou mas den esaki”, señor Croes a duna di conoce.
El a remarca cu pa loke ta trata e reglanan di DTI, ta reglanan cu tin di haber cu e uzo di e auto riba camindanan di Aruba y ta keda den man di DTI. El a remarca cu DTI mes mester duna informacion y conscientisa usuarionan di e reglanan aki y di kico mag of no mag di wordo uza na Aruba.
Esakinan ta conta tambe pa autonan nobo cu a wordo cumpra y no ta cumpli cu reglanan di trafico y di DTI, y ta core rond pa dos aña prome cu nan mester keur. Mientras cu nan entrada no ta prohibi, Douane ta laga nan drenta mientras nan ta cumpli cu reglanan di Douane.
