Diasabra awor porfin tin Calypso Showdown na Aruba

E tabata ausente durante Carnaval

• Esaki ta e lista oficial di participantenan
• Caiso Monarch cu premio gordo di 10 mil Florin 

ORANJESTAD (AAN): Stichting Musica ta den last lap pa e gran ‘Calypso Showdown 2025’ cu ta pertenece na Aruba Caiso Monarch.  E lo bay ta Diasabra awo 9 di Augustus na San Nicolas.

   E evento di Aruba Caiso Monarch 2025 a wordo totalmente transforma y den un bachi nobo, y ta wordo yama ‘Calypso Showdown 2025’.  Tin indicacion cu e actividad aki lo bay bira uno cu sigur Aruba lo no lubida, como cu e ta comienso di un bon futuro, tanto pa e cantantenan di Calypso, y pa publico disfruta y scucha y goza cu lo por tin un Calypso cu lo resona henter a؜ña.

   En general, artistanan di e genero aki a bin ta mehora cada aña nan presentacion y e calidad di produccion, y Aruba ta cla pa bay scucha Calypso keda toca henter momento di aña.  E ta un deseo di Stichting Musica pa e bira realidad.  Pues mescos cu demas islanan den Caribe, no ta djis durante temporada di Carnaval so ta tende Calypso resona.

   Awor Stichting Musica den colaboracion cu Setar NV, ta cla pa presenta e actividad cultural y musical mas grandi di Aruba.  Tambe lo ta bay organiza esaki cu sonido y luz di Elite Productions.  Asina nan ta invita pueblo di Aruba pa presencia e Aruba Caiso Monarch 2025 di Diasabra venidero.

   Calypso Showdown: E evento aki lo ta un forma autentico pa Aruba, no djis pa e color musical, sino por bay briya cu e colornan vibrante cu lo ta rond di e festival aki.  E lo bay ta den aire liber dilanti di Kulture Cafe na San Nicolas.   Lo bende e actividad tambe cu mesa, pa hendenan por sinta y disfruta di e presentacion di e Calypsonians.  Porta lo habri pa 7:00 pm, y e evento mes ta cuminza 8:00 pm.

   E plataforma nobo di e competencia lo bay tin un All-Star Band, bao direccion di Dwight Leoneta.  E ta conta cu 10 participante, cu lo subi escenario cu produccion original y lo tin di wordo presenta den forma di un show.

   Durante e anochi lo bay tin Claudius Philips como artista invita.  E lo ricibi un Lifetime Achievement Award tambe.  Diaranson anochi pa 7:00 pm lo bay tira lot pa cantantenan haya sa ki number nan a haya.  Esaki lo ta na Poets Studio na San Barbola.

   Un premio gordo: E evento ta Diasabra dia 9 di Augustus, y lo bay ta den aire liber dilanti di Kulture Cafe na San Nicolas.   Lo bende e actividad tambe cu mesa, pa hendenan por sinta y disfruta di e presentacion di e Calypsonians.

   Lo bay mantene un prijs familiar pa e evento, y entrada lo bay ta 35 Florin pa persona.  Tambe lo bende mesa pa 10 persona y na prijs di 350 Florin.  Ticket ya caba ta na benta riba e plataforma di Pay.aw pa bo tin bo ticket, of ta Citgo Boulevard y Citgo Essoville.  Pa mesa di 10 por cumpra esaki riba Pay.aw pa facilidad.

   Esaki ta un evento pa tur hende sinta!  Pues bo no mester hiba stoel, ya cu lo tin stoel pa tur hende.

   Cu e sosten ricibi, a anuncia cu e premio pa ganador of ganadora ta uno maximo di 10.000 Florin.  Lo tin premio pa mihor compositor, mihor areglista, premio pa best show, y premio di best costume.  Esaki lo ta bale la pena pa publico conoce kende ta bira e Aruba Caiso Monarch 2025.