Directora di LVV, Nathalie Maduro:
ORANJESTAD (AAN) – Directora di Departamento di Agricultura, Cria y Pesca, señora Nathalie Maduro, den entrevista cu DIARIO a sigui elabora tocante e tema di e piernan cu mester di mantenimento, y cu e Minister encarga ta bay aporta recursonan pa wordo drecha.
“Durante hopi aña, y di locual mi a compronde for di mi coleganan cu tabata na Santa Rosa prome cu mi, na Savaneta tabata tin piernan cu, enberdad, tabata cay bao e maneho di Santa Rosa. Pero nos a constata awo cu oficialmente nos no tin nan bao maneho. Anto, hopi biaha bo tin afspraak cu a wordo haci verbalmente, of bo sa cu hopi biaha e piscadornan ta haci uso di cierto piernan, pero aworaki Minister Wever a pidi nos e lista di inventario riba tur e piernan cu tin rond di Aruba, eigenlijk, pa wak cual ta esnan important pa e piscado anto, den cuadro di esey, por ehemplo e pier di Colony.
Ya nos ta ocupa caba cu e coleganan di DOW, y nos tin cu acerca tambe e coleganan di DIP, pasobra corda bon cu DIP, eigenlijk, ta responsabel pa ora cu bo kier aloca un pier, pidi e permiso necesario, etc”, Nathalie Maduro a señala.
El a agrega cu teniendo na cuenta esey aworaki LVV ta ocupa pa bay drecha full e pier na Colony cu ta den hopi mal estado y no ta di awe cu e piscadornan a meld di esey, pero aworaki e minister a pone placa disponibel e lo bay via un licitacion.
“Y nos ta spera cu pa fin di aña e trabaonan por ta cla pa e piscadornan tin nan piernan”, Nathalie Maduro, director di Santa Rosa, a comenta.
“Pa locual ta e otro piernan nos ta pendiente. Nos sa cu BID ta bezig y tin un proceso, tin un minister awor, nos ta tene un tiki pasenshi cu esey, pero si, enberdad, ta importante pa nos haya sa oficialmente, cual ta e piernan cu ta cay bao e maneho di Santa Rosa, y pa nos por haya e beheer tambe oficialmente, via un documento, formaliza esey tambe”, directora di LVV-Santa Rosa, a señala.
