Randy Maduro, PR Santa Rosa:
ORANJESTAD (AAN) – Randy Maduro, Relacionista Publico di Departamento di Agricultura, Cria y Pesca (LVV of Santa Rosa), den entrevista cu DIARIO a menciona cu for di aña pasa (2023), Santa Rosa a cuminza cu e idea di un “Pop up” market, cu di hecho ta tumando lugar caba.
Maduro a splica cu esaki no ta asina grandi manera mercado Santa Rosa, cu tabata e custumber, pasobra esaki ta rekeri di un parti financiero basta bon pa haci tur e preparacion. Pero manera semper, a pensa riba nos productornan local, cu no por laga nan na caya y e tipo di mercadonan grandi cu banda, cu yen di preparacion, cu tents tin su balente gasto, y a pensa riba e opcion di pop-up market.
“Anto e ora ey nos a bisa ‘well, ban haci algo mas chikito, cada un luna, un luna y mey of dos luna, y asina ey nos a bin cu e idea di bin cu un pop-up market. Esey ta riba Diasabra den un transcurso di un luna y mey pa dos. Bo ta bin aki na Santa Rosa, y claro, nos ta prepara un informacion, pon’e riba nos facebook di Santa Rosa. Diasabra awo, 6 di April, for di 8’or di mainta te cu 12’or di merdia, bo por bin aki cumpra bo producto”, Randy Maduro a indica.
El a agrega cu ta bay tin carni fresco, berdura, tomati, concomber,
Honey fresco cu a caba di cultiva e siman cu a caba di pasa.
“Kiermen, un sinfin di producto. Tin como 15 cunukero cu ta bin ofrece e productonan aki, fresco- fresco na nos clientela. Y, pa bisa berdad nos tin como cuater pa cinco biaha ta haciend’e caba den chikito, masha facil, masha conveniente y rapido. Bo ta yega, baha, cumpra bo producto y sigui, pasobra nos ta conciente tambe cu tin otro puntonan di benta, cu tambe ta riba tur diasabra. Anto nos tambe, cu ta sostene nos productornan local ta haci esaki cada luna y mey of dos luna, pa esnan cu no por yega na e puntonan ey, nos ta aki na Santa Rosa, mas chikito, cu 15 productornan bao un solo tent”, Maduro a reitera.
Randy Maduro a señala cu Santa Rosa mes, cu ta den e mundo aki di agricultura, ta mira cu cada rato cu nan acerca un persona of haci nan pop-up market ta sali un persona nobo cu kier participa.
“Un di nan ta Jair Britten, cu ta haci cria di carne y cabrito tambe ta plantando pampoena. Kiermen, nos ta bay tin carni di carne fresco y pampoena fresco den nos pop-up market, for di 8or di mainta te cu 12 or di merdia. Pasa cumpra y paga, e prijs ta na alcance di tur cartera, y sigui na e otro lugarnan”, Randy Maduro a acentua.
