ORANJESTAD (AAN): Diadomingo 24 di maart, Kiwanis Club of Aruba (KCA), e service club cu ta existi desde 1964, a organisa nan famoso torneo di golf caritativo na The Links at Divi Aruba.
E evento a wordo sosteni door di un record di 22 hole sponsors como patrocinador principal y alabes un cantidad di 100 hungadonan di golf, cu a sobrepasa tur expectativanan.
E fondonan recauda pa e aña aki a wordo aloca entre Muchila Creativo, esta 5.000 Florin a wordo otorga pa nan por cumpra un airco asina aporta na nan proyecto di conscientisacion y educacion sexual integral dirigi pa mucha y hoben uzando videonan moderno den un estilo accesibel. Un otro fundacion cu tin un proposito hopi importante y urgente ta Heart Centered Leadership Foundation; 5.000 Florin pa e fundacion por sigi organisa workshops y seminarionan pa hobennan pa yuda nan den nan desaroyo personal y profeshonal.
KCA kier a gradici di curason nos socionan y patrocinadornan principal cu un biaha mas a colabora hunto cu KCA como un ekipo solido pa logra e exito di nos 14 torneo di golf caritativo”. E ganadonan di e torneo ta como lo siguiente:
Closest to the Pin: Robert Aldrich.
Longest Drive Ladies: Julie Majerus.
Longest Drive Men: Chris Williams.
Best Gross: Pierre Rafini, Greg Martis, Giovanny Atencio, Alex Molina.
Best Net: Charles Latham, Derrick Huntington, Julie Majerus, Joshua Hubbard.
E aña aki como premio pa e hole-in-one tabata un Ford Territory Trend 2024 cu a ser poni disponible pa Yrausquin. Lamentablemente ningun hungador tabatin e suerte e aña aki pa hasi un hole-in-one, dus nos ta spera cu esaki si lo ta e caso pa otro anja!
KCA ta extende un danki di curason na tur hungadonan y hole sponsors cu a yuda, y hasta duna sosten financiero pa e torneo aki.
DIARIO a compronde cu otro aña lo tin dobel celebracion; lo tin e di 15 edicion di e charity golf tournament mientras cu e club lo celebra su di 60 aniversario trahando na bienestar di e comunidad Arubano!
Kiwanis Club of Aruba ta existi desde 21 di november 1964 y ta un di e service clubs mas antiguo di Aruba cu un total di 40 miembro. E meta principal di KCA ta pa mehora e bidanan di muchanan na Aruba. Esaki ta wordo realisa door di organisa diferente proyectonan pa recauda fondo, trabounan boluntario y proyectonan di concientisacion.
