ORANJESTAD(AAN)—Na 2017 Benny Sevinger a logra tranca e proceso legal cu mester a haci posibel pa Aruba prome cu eleccion 2017, a cera conoci cu e berdad di e
rapport Bo Aruba cu a investiga loke a pasa cu e fondo di 1.6 Miljard di placa di Pueblo.
Na 2021 uno di e ultimo tareanan di e constelacion actual di Parlamento di Aruba lo bira estudio di e Rapport Forensico cu a wordo prepara y presenta pa Forensic Services Caribbean, cu mester a duna contesta na pueblo di Aruba, kico a pasa den e compania Refineria di Aruba, cu a wordo lanta dor di Gobierno Mike Eman pa atende cu asuntonan relaciona cu e acuerdo pa e refineria Citgo.
E rapport cu a mira luz a nace di e acuerdo entre Mike Eman y Nicolas Maduro pa e proyecto Citgo, cu tabata uno di e misterionan gubernamental di Aruba aunke ley ta exigi pa asunto di gobernacion ta conoci cerca Pueblo.
Ta ora gobierno a conoce cambio na 2017, e acuerdo Citgo a perde su caracter di secreto pa pueblo y asina pa e mayoria nobo y Gobierno nobo di Aruba, cu a bira heredero di e proyecto desastroso.
Gobierno Wever-Croes a introduci cambio na Refineria di Aruba y e hunto nobo di Comisario cu a wordo nombra, a haya e tarea pa investiga loke a pasa den seno di Refineria di Aruba.
Gobierno Wever-Croes tabata tin motibo pa start e investigacion pero tambe pa pidi Ministerio Publico pa cuminsa cu un investigacion penal a base di informacionnan cu a cuminsa bini dilanti.
Fin di siman pasa DIARIO a wordo informa cu Prome Ministro Wever-Croes a entrega e rapport forensico cu el a ricibi di e Comisarionan di Refineria di Aruba na Parlamento di Aruba.
Di e forma aki e rapport a bira publico y a wordo descubri dor di DIARIO cu riba Face Book a topa tambe cu retratonan di Prome Ministro Wever-Croes kende tabata entrega e rapport na Parlamento di Aruba pa medio di un USB stick.
Un prome bista den e rapport di 168 pagina di cual DIARIO awor cu guia di expertonan ta tuma nota, ta produci un reaccion pio cu e rapport di 1.6 Miljard di Bo Aruba.
Repasando puntonan basico cu mester busca den un rapport relaciona cu un proyecto manera Citgo mester a bira, DIARIO mester a keda asombra pa supuesto falta di informacionnan basico hasta riba reunionnan cu mester a tuma luga cu presencia di Mike de Meza den su calidad di Ministro cu tabata representa e pais Aruba.
Tambe mester tuma nota di e tardansa pa Richard Arends a entrega su informacionnan y contesta na Forensic Services Caribbean.
DIARIO den e proximo dianan lo informa Aruba debidamente riba e rapport cu sigur lo bira un pagara si tene na consideracion informacion di e rapport cu ta bisa cu e ex dirigente di Refineria di Aruba Koolman lo no a laga prueba atras cu el a cumpli cu statuutnan di e compania pa pidi aprobacion di Hunta di Comisario pa e por a haci gastonan di riba 100 Mil Florin.
Mientrastanto e sumanan cu DIARIO a mira, ta digno di tur atencion y estudio sigur pa un pais manera Aruba, cu tabata den un crisis financiero y economico total na momento cu Gobierno Mike Eman a bay busca Citgo como un forma pa evita cu e barco lo a zink cu nan na mando prome cu eleccion 2017.
Ministerio Publico awor mester dicidi kico e ta haci.
DIARIO ta keda atento pa loke Raad van Advies a trece dilanti den e structura pa atende cu e proyecto refineria na Aruba for di momento cu Gobierno Mike Eman, despues di a firma acuerdo cu Nicolaas Maduro a pidi aprobacion di Parlamento pa a firma y realisa nan plannan.
