Diaranzon, Museo Arkeologico a habri su porta mas trempan pa ricibi un grupo di adulto mayor

Margarita Wever a relata: - *Den cuadro di October, Luna dedica na nan

ORANJESTAD (AAN) – Margarita Wever, Hefe di e Departamento di Educacion y Presentacion, na Museo Arkeologico, a duna di conoce den entrevista cu Matutino DIARIO, cu Diaranzon Museo a habri su porta un tiki mas trempan, pa ricibi un grupo di nos grandinan.

   Esaki den e contexto di Luna di October cu ta dedica na nos adultonan mayor. Museo Arkeologico a prepara un programa chikito pa nan, unda cu 9 or pa 11 or nan por a bin bishita e Museo, libremente, si nan kier wak e exposicion riba nan mes, of si nan kier a haya un guia tabata tin un pa 9:30’or y otro pa 10:30’or.

   Mientras tanto, nan a pasa un pelicula di e artista Trudy Lampe, produci pa su yiu pero ta bay over di e artista mes, con e ta traha cu klei, kico ta su inspiracion di nos antepasadonan pa traha su pochi y su urnanan, y kico ta su link cu e antepasadonan.

   El a agrega cu Museo tin un exposicion temporal di Lampe, y alavez nan tin un actividad di obra di man cu e grupo por cana drenta y si tin lugar participa, of djis cana rond y observa.

Margarita a splica cu e obra di man di e invitadonan cu ta conoce esey caba, y e idea ta pa nan ta algo leuk pa haci y cu tin un link cu e museo, e antepasadonan, etc., por ehemplo, con e indiannan a haci uso di vlechtmento.

   El a agrega cu ora cu e grandinan haci e rond leiding ta mas cu claro cu nan ta haya informacion. Pero ademas, e ta bay pa interaccion tocante recuerdonan cu nan tambe por tin, nan tin cierto informacionnan cu por comparti cu otro y cu Museo tambe. Asina nan por a pasa un rato agradable na Museo Arkeologico. Pa e dia aki, specialmente, nan a pone guianan “in place”.

Margarita Wever a menciona cu semper Museo Arkeologico ta habri di 9 or di mainta pa 4 or di atardi, pa cualkier persona cu ta interesa den bishita e museo.

El a indica cu si tin un grupo cu kier bin bishita museo, semper por yama of tuma contacto via email.