ORANJESTAD (AAN) – Diaranzon 19 di October aki, ta wordo conmemora y observa e Dia Mundial di e Lucha contra Cancer di Pecho, proclama pa e Organizacion Mundial di Salud (OMS).
E fecha aki tin e meta di sensibiliza y concientiza hende muher na henter mundo, tocante e importancia di realiza un test di pecho regularmente, cu e finalidad di detecta na tempo cualkier signo anormal.
E fecha aki a wordo impulsa door di e Organizacion Mundial di Salud, pa promove e diagnostico precoz di cancer di pecho, y tambe pa incrementa e acceso di e poblacion femenino na e control y tratamentonan oportuno di e malesa aki.
Cancer di pecho ta constitui e prome causa di morto den e poblacion femenino na nivel mundial. Segun estadisticanan di OMS, e malesa aki ta representa 16% di tur e cancernan den pashentnan femenino.
Tambe ta wordo estima cu un di cada 8 hende muher lo sufri di cancer di pecho den un momento di su bida, y pesey ta di vital importancia realiza un evaluacion regular di pecho.
A worde determina cu e deteccion precoz di cancer di pecho, ta incidi notablemente den e modificacion di e pronostico di e malesa, aumentando e posibilidadnan di curacion hasta un cien porciento.
Cancer di pecho ta un tipo di tumor cu ta wordo crea den e celnan y structuranan di e glandulanan den e tehido di pecho. Por disemina su mes na resto di e organismo pa medio di e adernan y di e “vasonan linfatico” locual ta conoci como Metastasis.
E tumor por ta di dos sorto:
Carcinoma “ductal” localiza: Esaki ta e desaroyo di e celnan di cancer cu ta inicia dentro di e conductonan di e pecho, y ta plama den e resto di e tehido di pecho. E por forma metastasis den otro partinan di e organismo.
Carcinoma “lobulillar in situ”: E celnan di cancer ta genera nan mes den e lobulonan di e pecho, y ta disemina den e tehido di e pecho y ta wordo considera cu esaki ta un tumor pre-maligno, pa motibo cu tin mayor tendencia na desaroya metastasis.
Tambe ta destaca otro tiponan di cancer di pecho manera “Angiosarcoma” y e “Malesa di Paget di Pecho”.
Entre e causanan of factornan di riesgo ta destaca:
Mutacionnan hereditario den e genes P53, PTEN, BRCA1 y BRA2 adkiri den e ADN.
Mayor exposicion na estrogen (produccion di e enzima aromatasa). Obesidad (consumo eleva di vet y caloria), edad avanza, consumo di alcohol y humamento, menstruacion precoz, menopause laat, factornan ambient.
Cancer di pecho ta afecta tur dos sexo, pero ta hopi mas frecuente cerca hende muher. Awendia, e desaroyonan y avancenan den e investigacion tocante e malesa aki, a contribui na aumenta e indicenan di supervivencia di e personanan afecta, reduciendo e mortalidad debi na cancer di pecho.
