For di 2008 asistencia militar specialisa di Bellarus na Venezuela
*Venezolanonan ta bandona nan pais y otro habitante ta drenta
* Prome refineria irani na Venezuela ta porta pa Iran den Caribe
ORANJESTAD(AAN)- E edicion di ayera, 18 di October di DIARIO, a duna prioridad na e desaroyonan mundial peligroso, cu Aruba sigur mester tene na consideracion debi na e papel cu Venezuela ta hunga den e coalicion di paisnan cu ta sostene Rusia directamente.
Na prome lugar a bolbe wordo mustra riba e hecho cu for di principio di e Guera di Ukraine, Venezuela a abiertamente a trece dilanti cu e ta sostene Rusia, pais cu Venezuela debe sumanan enorme.
E union di Venezuela cu Iran a wordo fortifica na Juni 2022 ora e dos paisnan a acorda pa forma un front contra loke nan a yama Imperialismo ora nan a firma un plan di cooperacion di 20 aña.
Un Miyon hectare di tereno pa planta na Venezuela ta parti di e proyectonan Irani na Venezuela, caminda e cantidad di habitantenan ta crece cu personanan cu ta bini di Bellerus, Rusia, Iran pa sostene proyectonan di e paisnan cu na Venezuela kier traha un centro pa expansion den e region.
Ayera informantenan a sigui bati alarma grandi atrobe relaciona cu e union entre Venezuela, Bellarus (e sostenedor directo di Vladimir Putin cu ta keda na frontera cu Ukraine) y Iran, caminda Gobierno di e pais mes ta den problema serio cu protestanan di Pueblo di Iran.
Crueldad y mas crueldad ta wordo raporta na Iran, caminda ayera protesta tabata dirigi tambe contra morto di un hobencita di 16 aña cu a wordo mata dor di e regimen di Iran pasobra e no kier a canta e himno di e pais.
Informantenan di DIARIO a trece dilanti cu ta e grupo di paisnan cu ta traha den cooperacion cu Vladimir Putin den e guera na Ukraine, ta e grupo cu ta sostene Venezuela actualmente.
Un spiertamento serio a wordo lansa pa Aruba cu mester tene na consideracion cu mas cu 7 Miyon Venezolano a bandona nan pais, pero cu mientrastanto gruponan di e paisnan cu reputacion controversial y peligroso a drenta y ta forma parti di e poblacion nobo di Venezuela.
E hecho cu ayera a keda publica den DIARIO cu Ministro di Petroleo di Iran a papia di e prome refineria di Iran na Venezuela, no ta representa un desaroyo nobo.
Interesante ta, cu Gobierno Irani a splica cu e prome refineria di Iran na Venezuela ta apertura pa mas refineria Irani den region, di cual pues Aruba tambe ta forma parti.
“Aruba mester tene cuenta cu un parti grandi di e poblacion realmente Venezolano ta biba awor den exterior. E cantidad di habitante di Venezuela ta subi cu e cantidad di personanan di e paisnan alia na Rusia, cu ta establece nan mes na Venezuela,” un informante a indica.
Informantenan ta regresa na e tempo di Chavez y ta mustra con den transcurso di tempo ta specialistanan militar di e grupo Comunista cu awe ta na guera na Europa, a percura pa adelanto di militarismo specialisa, cu awe por mira den accion na Rusia tambe.
“Aruba mester tene su posicion dilanti costa di Venezuela continuamente na vista,” a wordo indica na DIARIO.
No mester lubida segun e informantenan cu ta for di 2007 un centro di comando unifica a wordo introduci na Venezuela cu awe ta un refleho militar completo di Rusia.
Seguridad Nacional di Aruba na e momentonan aki mester ta central, segun informacionnan alarmante cu ta mustra con den e conflicto actual, Venezuela ta sirbi como e nucleo di sostenedornan di Vladimir Putin den loke por bira un guera mundial.
