Diego de Cuba, president di Sindicato STA:
ORANJESTAD (AAN)-- Presidente di Sindicato Trahadornan Arubiano (STA), Diego de Cuba, den entrevista cu Matutino DIARIO, a elabora tocante e resultado di e reunion cu Serlimar Suigeneris, tocante nan deseo pa cu e trahadornan cu tin derecho di haya mas pago y mas beneficio.
“Manera semper mi a bisa Serlimar ta un compania cu derecho di existencia, y tin hopi trahador den e compania aki.
Mi kier bisa cu ami, personalmente, como lider sindical ta di opinion cu e trahadornan aki mester bay ricibi un pago hopi miho” De Cuba a señala.
El a manifesta cu Serlimar ta, tambe, un compania di utilidad mescos cu NV Elmar, Setar NV, WEB Aruba NV.
“Anto pakico e trahadornan di Serlimar no por bay disfruta di un miho salario, si personalmente mi ta kere cu kizas si nan cambi’e, hacie un NV di Gobierno e por resulta mucho miho tambe, pasobra e por tin mas espacio cu por traha riba dje pa genera mas placa tambe”, segun Diego de Cuba ta remarca.
E lider sindical a indica cu e ultimo reunion cu STA tabatin cu señor Henriquez, a elabora basta extenso tambe di locual cu e trahadornan a entrega durante e temporada di Covid-19. “Anto nan a keda traha, y mi ta bisa cu e ta husto pa nan wak e situacion eynan y devolve e personanan aki, locual nan a entrega durante e temporada fastioso di e pandemia.
Aparte di esey tambe di un toelage cu ta tranca pa mas di 16 aña caba, cu mi ta haya mester hinca esaki tambe, pero tin hopi cos mas cu Serlimar por haci.
