Jeanine Tromp, Trahado Social di CEDEHM:
ORANJESTAD (AAN)-- Jeanine Tromp, Trahado Social di Centro di Desaroyo di Hende Muher (CEDEHM), den entrevista cu Matutino DIARIO a splica cu tur aña e ta organiza nan famoso “Red Tent”. Esaki ta un grupo di sosten pa hende muher, un grupo di combersacion y tur aña e ta bin cu un tema distinto.
“E aña aki mi kier haci cuater ‘red tent’ grandi, y esaki ta bay wordo haci den colaboracion cu MFA, unda tin oportunidad pa 50 hende muher bin, y scucha, vooral, e topico cu nos ta bay trata e cuater biahanan aki, cu ta tocante menopause. E prome cu nos ta bay trata ta yama ‘perimenopause’ anto esaki ta bay ta dia 25 di Maart, na MFA na Noord, anochi di 7 pa 9’or pm”, Jeanine a duna di conoce.
El a splica cu “perimenopause” ta prome cu hende muher drenta den e fase di menopause. “Asina ey, nos ta bay pasa den e otro fasenan. Na Mei ta bay tin y red tent grandi atrobe, y otro na Augustus, y na October lo finaliza cu Dia Internacional di Menopause”, Jeanine Tromp a menciona.
El a agrega cu e perimenopause ta core den edad entre 38-39 aña y comienzo di 40 aña. “E ta un parti cu hende muher ta pasa aden, unda nan ta bay experiencia cambio den nan curpa, den nan emocionnan, cabey por cay, nan por haya mancha, y tur esaki ta parti di e perimenopause, y nos ta bay duna un splicacion amplio, dia 25 di Maart”, Jeanine Tromp a relata.
El a duna di conoce cu lo tin dos experto riba full e tema di perimenopause, y nan ta couch cu a studia henter e tema aki, y sa hopi bon kico ta e fasenan cu nan ta bay splica.
“Esun cu nos ta bay trata na Mei ta bay ta tocante hende muhe cu a drenta den e fase di menopause anto nan por haya problema di salud mental, depresion, ansiedad. Na Augustus nos ta bolbe parti’e un tiki, ora bo ta den menopause mes, kico ta e alimentacion cu por yuda bo. Pa tur e cosnan cu bo ta sinti tin alimentacionnan cu por yuda bo, for di ehercicio y asina nos ta keda den tur e fasenan p’asina hende muher por compronde, y conoce nan mesun curpa, kico ta pasando” Janine Tromp a señala.
