Ursell Arends, Lider di Raiz:
ORANJESTAD (AAN)-- Segun Lider Politico di Raiz, Ursell Arends, e señalnan cu Gabinete AVP - Futuro ta manda awor no ta consistente cu e liña di pensamento cu e ta manifesta den su relato “pa gara e toro na su cacho”, relaciona cu excesivo turismo crusero y su consecuencianan pa Aruba.
“Es mas, ta parce hasta di no tin e compromiso suficiente pa ehecuta locual ya a wordo discuti. Ta parce cu kier purba di gana tempo of sconde pa tuma e decisionnan pa frena e crecemento descabeya di turismo; manera anuncio di minister di turismo pa cera tur beach 1 dia pa luna na 2028, esaki den mi opinion ta un ‘losing proposition’ si enberdad e obhetivo ta regeneracion di naturalesa. Por mira ehempelnan concreto di paisnan manera Tailandia (Maya Bay), Philipina (Boracay Island) cu a cera pa un periodo largo pa duna naturalesa su espacio pa regenera debi na impacto di turismo cu a destrui naturalesa. A habri bek, pero cu maneho concreto.
Esaki ta locual cu ta yama ‘bold decisions’. For di ultimo declaracion di varios lider den nos comunidad mi a tuma nota cu riba papel, en todo caso, a dicidi caba di atende cu turismo di masa. Locual falta awo, ta e decisionnan concreto y ehecuta na tempo pa realiza esaki. Mi no ta kere nos tin luho di
tempo pa warda e momento ideal pa tuma y implementa e decisionnan importante aki.
Mester gara e toro na cu cacho awo; dicidi y ehecuta.
For di mi punto di bista, e maneho di turismo mester ta husto, no solamente pa e generacion actual pero tambe pa futuro generacionnan, locual ta rekeri decisionan firme cu esaki den bista. Decisionnan cu podise ta haci dolor y cu kizas ta crea malcontento den comunidad, kizas hasta perdida di voto, pero cu ta mihor pa nos pais riba largo
plazo. Decisionnan duradero y husto entre generacionnan, y mas cu tur cos…decisionan cu ta gara e toro na su cacho!
Pa cifranan concreto di e crecemento di turismo na Aruba por bishita:
https://raizaruba.com/ursell-arends-raiz-pa-un-aruba-dushi-pa-biba-ta-rekeri-pa-gara-e- toro-na-su-cacho.
