Comunicacion di telefon ta cay afo y television a bira problema - *Un peticion pa servicio wordo mehora ta bay na e compania
ORANJESTAD (AAN) — Un problema serio a wordo crea den cierto barionan na Aruba, caminda modernisacion mester a haci su entrada pero ciudadanonan sigur di mas edad, ta haya nan mes den problemanan.
Disfruta di programanan di television, di “cable network” manera na idioma moderno a bira popular, a bira sumamente dificil pa hopi hende cu a sigui un curso special pa atende cu e sistema nobo cu Setar a introduci.
Control remoto di television a bira un puzzel grandi pa sigur personanan cu no ta conoci cu secretonan tecnologico y no ta capaz pa maneha nan aparato di control di television cu e resultado cu nan no por disfruta di nan programanan di television.
Pa personanan cu ainda kier coneccion lo tin problema mucho mas serio.
Informacionnan ta drenta di personanan cu a paga pa e instalacion di sistemanan pa nan disfruta di nan television pero ya tin lunanan den e sala di espera di Setar.
Kico ta pasa realmente no ta conoci pero hecho ta cu hasta durante combersacionnan cu ta wordo hiba cu DIARIO pa presenta e problema, tin interupcion continuo.
Yamadanan telefonico a bira sumamente dificil pa abonadonan di Setar.
Continuamente tin problema pa un hende scucha otro loke ta haci cu no por papia normal cu otro mas na telefon.
Ciudadanonan cu ta reclama, ta sumamente contento cu mundo a bira moderno y cu metodonan nobo ta wordo introduci. Sinembargo den e introduccion aki mester tene cuenta cu no ta tur hende tin un estudio tecnico necesario sigur pa por atende cu e necesidadnan actual.
Problemanan ta bini dilanti sigur di e poblacion di mas edad, cu ta hustamente e clientenan cu mas mester di nan television di cual nan ta depende pa informacion internacional.
“Hobennan tin nan telefonnan y nan forma di comunica den un rato cu henter mundo cu hopi hende di edad mas avansa no conoce,” ta un keho cu ta bini dilanti.
Tambe hobennan tin un bida mas activo cu grandinan cu tin necesidad di nan aparato di television y bon coneccion internacional.
Telefon pa nan tambe ta sumamente importante y no por ta asina cu yamadanan ta bira dificil pasobra continuamente e comunicacion ta kibra.
Tin ciudadano cu ta pensa cu ta miho pa debolbe nan e ekiponan y instalacionnan bieu pa asina nan por disfruta di loke nan tabata tin.
Ta keda e peticion di hopi ciudadano cu ta den fila pa wordo yuda pa asina finalmente nan por wordo conecta pa e servicionan pa cual nan a paga pa instalacion.
