Dialuna a habri cu otro dos fayecimento relaciona cu Covid-19

Manera a pronostica, cifranan na Hospital ta den aumento

ORANJESTAD (AAN):  Siman a habri cu algun cifra cu ta duna speransa mientras cu otro cifranan den un sfeer nada bunita.

Departamento di Salud a indica cu segun resumen di dialuna, 517 persona a recupera y un total di 284 caso nobo di COVID-19 a keda registra di cual 27 ta no-residente.

E cifranan aki ta representa un 'Positivity rate' bou di  residentenan di 67%.

E cantidad di casonan activo di COVID-19 ta 1280 y cantidad di fayecidonan relaciona cu COVID-19 a aumenta na 186. Forsa na famia di e fayecidonan.

Datonan ta ilustra casonan nobo di COVID cu un averahe semanal di 441 caso pa dia y un averahe di 'positivity rate' semanal di 63% pa dia.

Actualmente na Aruba tin 55 persona interna cu of debi na COVID di cual den ICU tin 6 persona y riba piso general tin 49. Na Colombia tin actualmente 6 persona den ICU y ninguno (0) riba piso general.

Cifranan di Hospital ta mustra cu for di juli 2021, 61 persona (79%)  no vacuna a fayece  na Aruba relaciona cu Covid-19. Mientrastanto, 13 persona completamente vacuna (17%) y 3 persona parcialmente vacuna (4%) a muri como resultado di e malesa.