PR di BCI ta splica e situacion:
*Desde Drive Inn te Talk of The Town:
ORANJESTAD (AAN) – E Relacionista Publico di Bureau City Inspector, Robby Rosel, a declara den rueda di prensa cu riba e caminda principal for di Drive Inn bin abao te cu Town of the Town, un cantidad grandi di sushi ta wordo haya tur Dialuna.
Ta sushi cu ta bula for di e trucknan cu ta transporta desperdicio y sigur e fout ta sinta den e hecho cu hopi automobilista no ta uza un lona, pa por tapa e sushedad. Nan ta mare cu un cabuya pero e bien fuerte di ultimo dianan ta bul’e y asina e sushedad ta plama riba tur e camindanan.
“Pero tambe nos tin e bon noticia cu tabata tin un reunion cu a tuma lugar entre DOW, Bureau City Inspector, Cuerpo Policial y eynan nos a yega na un acuerdo cu ya caba dialuna ta bay cuminza cu e mantencion di Green Corridor, unda cu sigur e sushedadnan di tur dialuna mainta y tambe durante di e siman, lo bay tin control di DOW cu ta encarga cu esaki y tambe BCI su ploegnan lo tira un bista pa ora cu tin sushedad, nan tambe por haci control”, Rosel a indica.
Asina, nan ta spera di conta cu e automobilistanan pa por fabor, uza un lona pa tapa e sushedad cu nan ta transporta, pasobra esey ta hopi importante, y tene na cuenta cu pronto lo bay tin camaranan riba camindanan di Aruba, y e ora ey sigur, e boet lo yega nan cas sin previo aviso y tin cu cumpli cune.
E pickupnan cu ta core sin lona KPA ta esun encarga pa stop nan automaticamente, y Bureau City Inspector por sigui nan te na sitio cu nan ta bay, y papia cu nan.
Y tambe BCI kier a pidi, encarecidamente, mirando cu nos ta den un temporada di hopi biento, y tambe di horcan, pa no tira sushi den e rooinan rond di nos Isla.
“Nos tin hopi di e rooinan cu tin sushedad den dje; trabao ta na gran escala ultimo dianan, pa haci e rooinan limpi di hopi sushedad cu ta monta den nan, y na tur parti di Aruba por mira esaki”, Rosel a señala.
BCI ta sigui haci control y tin un plan pa e ultimo cinco lunanan di e aña, y otro siman lo trece esaki dilanti pa comunidad di Aruba conoce e plannan cu tin desde cuminzamento di Augustus proximo te cu December venidero.
Finalmente, Robby Rosel ta pidi comunidad pa haci mas uso di Fixi, download y manda tur informacion pa City Inspector. Ainda e comunidad no ta haciendo suficiente uso di dje.
