Dr. Marck Oduber durante e di dos sesion cu stakeholders:
ORANJESTAD (AAN) – Dr. Marck Oduber, Experto Cientifico di UNESCO Aruba, a elabora den entrevista cu DIARIO, riba otro programa di UNESCO cu no ta relata directamente na e Congreso Oceanografico Intergubernamental, den cual el a participa na Paris.
Esaki ta e asina yama “Man and Biosphere” (MaB), cu e idea di bin cu un sistema biosferico na Aruba. Manera ta conoci e programa aki ta pa mehora e relacion di e persona cu su entorno.
El a splica cu hopi pais tin areanan proteha pero pafo di e areanan aki por haya areanan cu no ta mucho sostenible, of amical cu nos medio ambiente of cu henter e ecosistema.
Oduber a splica cu e parti di Programa “MaB”, cu ta cay bao di Ciencia di Mundo, tin tres region proteha, y e ta un idea noble cu ta existi for di añanan 70, rond mundo.
E programa MaB ta hopi grandi y na henter mundo tine, y a ripara cu den e region Caribense tin un dekort den e paisnan di Reino Hulandes, paisnan Ingles y islanan chikito.
E ora ey UNESCO a bin cu e oportunidad pa Aruba bin na remarca pa bin cu e programa hopi noble aki, y cu tin hopi efecto secundario bon pa e pais. Na Aruba ainda nan ta papiando cu stakeholders, departamentonan di gobierno, mester papia cu tur minister tambe y parlamentarionan, ya cu UNESCO a bin Aruba caba y a papia riba e tema aki. Esey ta e motibo pakico a tene un di dos sesion cu e stakeholders di medio ambiente. El a remarca cu te awo Aruba a cuminza cu e programa di “Man and Biosphere y mester logra pa e pueblo carga e programa, pasobra si no ta asina no por traha riba e dossier cu ta indica con kier cambia e pensamento di e hendenan na Aruba, cu mester tin e area proteha pero cu pueblo tambe ta biba na un manera mas saludable cu su medio entorno.
