Dialogo cu grupo di operadornan di tour UTV ta esencial pa yega na solucionnan practico

Fraccion AVP:

ORANJESTAD (AAN): Recientemente, miembronan di Fraccion AVP, den persona di Sra. Jennifer Arends-Reyes, Sr. Carlos Bermudez, Sr. Clifford Heyliger y Sra. Otami Thomasia, a reuni cu un grupo di operadornan di tour UTV pa tende nan preocupacionnan tocante e limitacionnan actual y e impacto cu esakinan por tin riba nan empresanan, nan trahadornan y e tipo di atraccion cu Aruba ta ofrece su bishitantenan.

Durante e encuentro, e operadornan a comparti nan experiencia y a enfatisa e necesidad di mas claridad tocante e reglanan, e areanan cu por uza y e manera cu lo implementa y controla e medidanan.

Fraccion AVP ta sostene plenamente proteccion di nos naturaleza. Aruba su medio ambiente ta un parti esencial di nos identidad, pero tambe di nos producto turistico. Esey ta nifica cu nos mester cuida nos naturaleza di manera serio y sostenibel, pa generacionnan actual y futuro por sigui disfruta di dje.

Sinembargo, cualkier medida mester ta cla, proporcional y debidamente hustifica. E medidanan mester ta prepara den dialogo cu e sector, teniendo na cuenta e realidad di e empresanan cu a inverti, crea oportunidad di trabou y contribui na e experiencia turistico di nos isla.

Pa Fraccion AVP, e solucion no mester ta un scogencia entre naturaleza of economia. Mester busca un modelo balansa cu ta proteha areanan vulnerabel, garantisa siguridad, promove comportamento responsabel y, na mes momento, ofrece e operadornan un marco cla y realista pa por funciona.

Dialogo cu e sector ta esencial pa yega na solucionnan practico, garantisa cumplimento efectivo di e reglanan y evita cu empresarionan y trahadornan local bira victima di medidanan cu no ta suficientemente prepara, coordina of comunica.

Fraccion AVP lo sigui duna seguimiento na e preocupacionnan presenta y ya a entrega preguntanan oficial y urgente na Gobierno pa haya claridad tocante e situacion.

Nos posicion ta cla: proteccion di naturaleza, siguridad y trabou local por y mester bay man den man. Cu cooperacion, claridad y responsabilidad, por yega na un solucion faborabel cu ta proteha nos medio ambiente, nos economia y e interes di Aruba.