Dialogo cu ATIA ta parti esencial pa un maneho economico y financiero cu ta refleha e realidad di comercio

Minister Geoffrey Wever

ORANJESTAD (AAN):  Minister di Finansa, Asunto Economico y Sector Primario, mr. Geoffrey Wever, a tene su prome reunion oficial cu e directiva di Aruba Trade and Industry Association (ATIA), Sr. Herrick Henriquez, Sr. Danilo Werleman, Sra. Rachel Maduro y Sr. Fred Steegh. Colaboracion entre gobierno y sector priva tabata e punto central durante e encuentro.

Durante un dialogo habri y productivo, Minister Wever a scucha preocupacionnan y sugerencianan di ATIA, representando e empresanan clave na Aruba. E reunion tambe a sirbi pa actualisa ATIA riba diferente desaroyonan economico y financiero, explorando espacio pa mas cooperacion structural.

Entre e temanan clave discuti tabata:

• Update riba e Rijkswet Financiero y su implicacion pa tasa di interes;
• Propuesta di incentivonan fiscal traha pa Comissie Economische Herstel, trahando riba esaki den colaboracion cu Hulanda (Landspakket), Belastingdienst di Aruba y Departamento di Asunto di Economico di Aruba;
• Update riba e ampliacion di e regimen di freezone;
• Sugurencia pa optimalisa servicio di aduana;
• Reforma di regimen di vacation rentals;
• Mehoracion di e proceso di permiso di negoshi. 

Compromiso pa cooperacion continuo

Minister Wever a expresa cu e gobierno ta reconoce e rol esencial di sector priva den progreso economico. "Nos mester traha pa un sector empresarial mas competitivo y sostenibel. Dialogo cu ATIA ta parti esencial pa un maneho economico y financiero cu ta refleha e realidad di nos empresarionan,” Minister Wever a declara. 

ATIA tambe a expresa su disposicion pa sigui contribui activamente cu recomendacionnan concreto pa bienestar di e pais. E reunion ta representa e compromiso di gobierno pa basa su desaroyo economico riba consensus, dato, y realidad empresarial. Minister Wever ta mira padilanti pa un dialogo continuo cu ATIA den un forma structural y proactivo.