Presidente di CUA ta revela:
*Esey lo haci cu cuminda lo bira hopi caro na Aruba!
ORANJESTAD (AAN) – Frans Ponson, Presidente di Comerciantenan Uni Aruba (CUA), den entrevista cu DIARIO a bisa cu nan a pidi un reunion cu minister di Economia caba, pero pa motibo cu nan ta nobo y yen di cambio, a pidi CUA pa warda un rato prome cu un reunion, locual e comerciantenan ta haci tambe, no obstante nan tin hopi tema pendiente.
Ponson ta kere cu den e luna di Mei aki mes, lo mester tin un reunion cu gobierno y cu e comerciantenan mes ta bay bin cu un video pronto, cu tambe ta concerni pueblo, pa mustra un par di punto cu ta preocupante pa e comerciantenan. E preocupacion mas grandi cu tin aworaki ta si dollar ta devalua.
Ponson a agrega cu tin hopi cos cu ta hungando un rol den e dianan aki y ta haci cu e economia ta un poco turbulento, y nos no sa kico ta pasa, un dia ta bisa un cos y ta cambia di un dia pa otro.
“Bo ta wak con Trump un dia ta bisa un cos otro dia ta bisa otro cos, y aworaki bo no sa ki ta pasa, y manera mi a bisa den pasado, nos cuminda ta stabil pasobra nos no ta cumpr’e for di Merca, pero den tur e locuranan aki bo n' sa ki ta pasa”, Ponson a reitera.
Frans Ponton a señala si, cu si pa mala suerte e dollar ta devalua, nos florin ta devalua cu ne, y e ora ey si Aruba lo ta den problema pasobra tur loke nos ta cumpra pafo tambe ta bay subi di prijs, pasobra e ora ey nos tin cu cumpra e currency.
“Kiermen, si nos cumpra carni di Europa of di Brasil, prijs ta bay subi. Al momento, ta hopi dificil pa bisa algo. Aworaki Merca a tuma un decision pa baha cu China atrobe, kiermen ta hopi dificil pa specula, pa duna un opinion aworaki, pasobra e ta cambia pa dia, aworaki”, Ponson a reitera.
E preocupacion mas grandi cu CUA tin aworaki ta si dollar ta devalua. “Tur hende aki na Aruba sa, cu e florin ta acopla na e dollar. Kiermen si e dollar devalua (y e ta caba pasobra el a bira mas caro pa nos), esey lo haci cu cuminda importa por bira hopi caro pa Aruba”, segun Frans Ponson.
El a subraya cu Aruba ta den hopi incertidumbre encuanto kico por pasa pasobra nos pais ta hopi vulnerable na kico cu por sosode. Por mira kico a pasa cu aumento di prijs di webo, pero eynan tabata tin alternativa, y esaki semper tin. No obstante si e valor di e moneda devalua eynan si no tin alternativa.
