ORANJESTAD (AAN): Diasabra 26 di september, Scouting Aruba a forma parti di e tercer edicion di Cuida Aruba,
cu participacion di Explorer y Verkenner di Grupo Scout Ora Ubao y Grupo Scout Casibari. E hobennan a pone man na obra hunto cu otro boluntarionan pa contribui na limpiesa y cuido di nos isla.
Durante e actividad, e Scoutnan a participa activamente den coleccion di sushi y plastic, poniendo den practica balornan cu ta forma un parti importante di Scouting, entre otro servicio na comunidad, responsabilidad, trabou den ekipo y respet pa naturalesa.
Pa Scouting Aruba, participa den iniciativanan manera Cuida Aruba ta un manera importante pa ofrece hobennan oportunidad pa transforma loke nan ta siña den Scouting den accion concreto. Door di nan participacion, nan ta experimenta cu cuido di ambiente y bienestar di comunidad no ta responsabilidad di un solo organisacion, sino un esfuerzo cu ta pidi participacion di tur hende.
Cuida Aruba ta basa precisamente riba e pensamiento di responsabilidad comparti. Den comunicacion oficial rond di e actividad, Prome Minister Mike Eman a enfatisa cu cada persona por contribui na cuido di su propio ambiente y comunidad. Gobierno di Aruba a señala tambe cu e iniciativa ta busca reuni organisacionnan, boluntarionan y residentenan pa aporta activamente na nan bario y na cuido di Aruba.
E participacion di Grupo Scout Ora Ubao y Grupo Scout Casibari ta encaha cu e meta di Scouting Aruba pa forma hobennan activo, consciente y dispuesto pa sirbi nan comunidad. Actividadnan manera esaki ta yuda cultiva desde un edad tempran e sentido di responsabilidad pa cu e luga unda nos ta biba.
Scouting Aruba ta expresa su gradecimento na CEDE Aruba pa e organisacion y oportunidad brinda na comunidad pa participa den Cuida Aruba. Gradecimento ta bay tambe na Gobierno di Aruba y Prome Minister Mike Eman pa e iniciativa, y na ATHA pa su aporte y colaboracion. Scouting Aruba ta gradici igualmente tur organisacion, partner y boluntario cu a contribui pa haci e actividad posibel.
Cu nan participacion, e Explorer y Verkennernan a demostra un biaha mas cu Scouting no ta solamente aventura y recreacion, sino tambe servicio, responsabilidad y compromiso cu comunidad y naturalesa.
